Hakha Nih Suu Kyi Sin Ah Thing-ahnak Sehzung Le Zuarnak Telh In Thil Phun 6 An Hal
Tawk Tling Thang| 2019 January 20| January 20 zanlei sang ah Chin khualipi Hakha a rak phanmi Myanmar rampi Ruahnak Petu Daw Aung San Suu Kyi sin ah Hakha khuami nih Thing-ahnak sehzung chiahpiak ding le Thing zuarnak hmun chiahpiak ding telh in thil phun 6 an hal.
Cu thil phun 6 an halmi cu a tanglei ning in a si.
- “Bungzung ah thing-ahnak sehzung hun ding le Hakha khuapi chung ah thing zuarnak hmun tuahding in kan hal lai.
- Hakha sii-inn ah siibawipi Mit siibawi le Hngawng cung siibawi (hnakhaw, hrom, hnar) chiahpiak ding in kan hal lai.
- Hakha khuapi chung tivate panga remhpiak ding in kan hal lai.
- Pu Ral Hmung Certual pinlei ah ekah 5 a ummi shopping Mall sak ding le Public Park (Pyithu Yinpin) tuahding in kan hal lai.
- Nihin tiang Timit dinti kan din khawh rih lo caah rianrang in kan tuahpiak uh kan theihter lai. Cun, Laiva dinti zong Hakhathar caah laak ding in kan hal chih lai.
- Sangthar samh cuahmah mi le khuapi heelnak lam cawhmi kong kan hal lai. A hleikhun in sangthar samhmi dinti, mei, lam le lutihor caah ks. nuai 1000 kan hal lai” tiah The Chinland Post ah a chim.
A cunglei thil phun 6 cu Hakha Sipin Committee in Pu Khin Maung Win nih Carson Hall ton biaruahnak zapi hmai ah halnak a tuah i Daw Aung San Suu Kyi nih thil umtuning a fianh hmasa. Cu dih hnu ah Suu Kyi nih ca a kan pekmi ah hihi cu Chin ramkulh cozah nih leh ding an ti caah anmah nih in let hna seh a ti. Cun, Chief Minister Salai Lian Luai nih simanking an ngeihmi a si kong le thil sining a fianter.
Hakha sii-inn ah siibawipi Mit Siibawi le Hngawng cung siibawi chiahpiak ding nan halmi le Sangthar samhnak caah ks. Nuai 1000 nan halmi cu anmah he aa pehtlaimi ministry zung kan chimhpiak hna lai. A dang khi cu Chin ramkulh cozah tawlrelnak in a tluang ko lai dah ti a leh hna.
Daw Aung San Suu Kyi le ramkomh minister cheukhat cu January 20 zan cu Hakha ah an riak. January 21 zingka ah Hakha khuacuanhnak Parthlam (Tower) le Lai Kutka “Lawng” hunnak a tuah lai. Cu dih khawh in Hakha college le sianginn cheukhat a zoh dih hnu ah Falam peng Surbung tlang vanlawng tual sak liomi zong a zoh lai.
Surbung tlang vanlawng tual a zoh dih in Tonzang peng lei ah a tlawng rih lai. Laitlang a tlawn dih hnu ah Kalay ah a kir than lai I Kalay Town Hall ah Kalay khuami he ton biaruahnak an ngei lai. Cu dih hnu ah Kalay in Naypyidaw lei ah vanlawng in a zuang than te lai tiah kan theih.
About The Author
