Hakha khuami pakhat bomrap ruangah a ke khatlei a bul
The Chinland Post | 2022 October 3 – Chin ramkulh, Hakha khua, Hakha Thar sang ah a ummi Pu Biak Cung (kum 30) cu October 1 ah ramlak ah mehhang a kawl lioah bomrap aa lamh sual caah a ke khatlei a bul tiah theih a si.
Bomrap aa lamh sual i atu hi Hakha sizung pi ah aa thlop lio a si tiah khuami nih The Chinland Post ah an chim.
“Ramlak ah mehhang kawl ah a kal i bomrap aa lamh sual caah a ke khatlei aa tan. A kehlei kut zong aa hliam” tiah a chim.
SAC nih hramhram in uknak a lak hnu 2021 thok in Chin ramkulh ah bomrap aa lamh sual mi minung 10 nak tlawm lo an i hliam cang tiah Chin Nuhrin Covo phu sin in theih a si.
2022 January in May thla dongh tiang thla 5 chungah Myanmar ram pumpi in bomrap aa lamh sual mi minung 33 an thi cang i 129 an i hliam tiah UN OCHA nih August 10 ah a rak thanh.
About The Author
