Hakha Khuathar Ah Motor Cung In Minung Pakhat A Tla I A Thi
Salai Cung Cung|2018 July 3| Hakha Khuathar sang, July 2 suimilam 11:00am ah tlakrawh a phormi motor cung in miung pakhat a tla i a thi. A thimi hi Win Kyaw (kum 20) a si.
Tlakrawh a phormi motor cung in a tla i a lu fakpi in aa khawnden caah Hakha sii-inn ah an kalpi hnu sii-inn ah a thi. Thil a canning cu a tanglei bantuk in a si.
U Kyaw Htay nih a ngeihmi skat motor 7K/8680 in motor mongtu U Khin Maung Lin le a zultu U Win Kyaw cu Hakha khuathar sang Semaing zung chiah ding in tlakrawh 4500 an rak phor. Semaing zung hmai kutka luhnak lamkam ah motor cung thil pawl thlak ding ah tlakrawh an khuhmi muka pawl a laak lio ah Win Kyaw cu a naal caah motor cung in kat-ta-ya lam cung ah a tla. A lu faktuk in aa khawn caah mah hngalh lo in a um i Hakha sii-inn ah an kalpi colh i sii-inn an phakpi hnu ah a thi tiah a thimi pa a pu zong a si i motor ngeitu zong a simi U Kyaw Htay sin in kan theih.
A thihnak kong he pehtlai in palek nih ahmuh (case) an hun hnu ah zeitindah a thihning a si timi chekfelnak an tuah hnu ah a ruak an tinpi tiah kan theih.
About The Author
