Hakha Khuathar In 6D A Hmutu Mai Cer Hlei Iang He Biaruahnak
Cer Hlei Iang
City Hunter| 2018 June 2| 2018 kum Myanmar ram pumpi tanghra result cu June 2 ah a chuak. Hakha Khuathar sang in Mai Cer Hlei Iang nih 6D (All Distinction) a hmuh. The Chinland Post nih a tanglei bantuk in amah kong ton biaruahnak tawi kan hun ngeih.
TCP: Na konglam tawi na kan chim kho hnga maw?
Cer: Keimah hi unau chuakti pali lakah a hniangbik a si. Ka nu le ka pa cu Pu Lian Thang le Pi Thla Zing an si, ka nu nih a kan thihtak cang. Hakha, Khuathar sang ah a ummi kan si.
TCP: Tanghra na kainak?
Cer: Tanghra hi Monywa ah ka kai. Tanghra na kainak hi private in tuahmi Paramy boarder ah a si.
TCP: Zei Major in dah 6D (All D) na hmuh?
Cer: Biology major in a si. 6D ka hmuhmi subject hna cu; Myanmar, English, Mathematics, Chemistry, Physics le Biology an si.
TCP: 6D hmuhding hi naa timhciami a si maw, na hmuhmi cung ah na intuarmi (feeling)?
Cer: 6D hmuh khawh ding hi ka saduhthah a si, kaa timhciami a si ko. A kumkhatnak bak ah 6D he teinak le awnnak ka hmuhmi cung ah Pathian sin ah lawmhnak bia ka chim. Kaa lawmtuk, kaa nuam tuk ti leng cun a chimzia ka thiam ti lo.
TCP: Zeiruang bik ah dah 6D na hmuh khawhnak a si?
Cer: Pakhatnak bik ahcun Pathian dawtnak le lam hruainak thawng in a si. A pahnihnak cu a ka zohkhenhtu hringtu ka pa le ca ka chimtu boarder saya/mah te thawng in a si. A pathumnak cu kan kainak boarder nih cacawn le cazoh ningcang timetable an kan tuahpiakmi ningte in ca ka zoh ruang le cachimh an thiam ruang ah a si. Palinak cu keimah hrimhrim zong Pathian sin thlacam bu te in zuamnak ka ngeih ruang bik ah hin a si ko.
TCP: Tanghra na awn hnu ah zeidah naa tinhmi le cawn na duhmi a si?
Cer: Keimah nih cawn le kai ka duhmi cu siibawi (Doctor) line hi a si. Phundang in cun medicine line hi a si. US a ummi ka u nih hin tanhra ka kai lio te in siibawi lei na kai lai. Cuti na kai khawhnak ding ah mark sang na hmuh a hau tiah keimah nih saduh ka thahmi cung ah thazaang peknak le forhfialnak a kan ngeih.
TCP: Sianginn kai liomi sin ah biacah na duhmi?
Cer: Pakhatnak ah a biapi bikmi cu Pathian i bochan le thlacam bu tein cazoh hi a si. A pahnihnak ahcun mah hrimhrim tinhmi ngeite in i zuam a herh. Teirialnak he i zuam lo ahcun san a tlai lo. Teinak hmuh duh ahcun mah pumpak hrimhrim i zuam hi teinak tawhfung a si bik ko.
TCP: 6D na kan hmuhpiakmi cung ah kan i lawm. Naa tinhmi le na saduhthah a tling hlan tiang Pathian nih lam in hruai ko seh.
Cer: Amen. Na kan lawmhpi caah kei zong kaa lawm tuk ve.
Chin ramkulh ah tanghra a phimi lakah Distinction tambik a hmutu hi Dawt Tha Par le Min Cung Nung an si. 5D an hmuhmi cu; English, Mathematics, Chemistry, Physics, Biology veve an si.
Yangon ah a phimi Hakha Khuathar sang um Daniel Cung Tha Thawng nih 5D a hmuh tiah kan theih. Ramthen dang ah tanghra a phimi Matupi nu zong nih 6D ahmuh tiah kan theih.
Biakilh: Chin mi chung in 6D le 5D a hmumi kan hngalhchap hna ahcun thawng kan van in thanh chap than te lai.
About The Author
