Hakha Le Falam Kar Lehlang In Khualtlawng Bus A Chuak Cang

City Hunter| 2018 November 6| Chin ramkulh khualipi Hakha le Falam karlak ca te lawng in a chuakmi khualtlawng bus cu November thla thawk in khan lehlang in chuah hram an thawk cang tiah theih a si.

“Kan hnuzarh (November thla thawkka) in khan chuah hram kan thawk cang. Hakha le Falam karlak ca te in a chuakmi bus hi niftin a chuak lai i zinglei le zanlei in nikhat chung ah lehlang in an chuak. Zinglei suimilam 7:00 in Falam in aa thawh lai i zanlei suimilam 4:00 in Hakha lei ah a kir than lengmang lai. Atu hi chuah hram kan thawk ko cang, motor citman minung pakhat ah ks. 5000 a si” tiah Hakha Taungzat gate tuanvo ngeitu nu pahat nih The Chinland Post ah a chim.

Falam le Hakha karlak khualtlawng bus hi October 12 in kal hram thawk an rak timh nain relremlonak a um ruang ah atu ceo lawng an chuah khawhnak hi a si.

“Hakha le Mindat kar zong hi khualtlawng bus kal hram thawk kho ding in timhtuahnak nganpi kan ngei. Tu thla chung ah chuah hram kan thawk kho ko lai” tiah Hakha Taungzalat gate tuanvo ngeitu pakhat nih a biapeh ah a chimchih.

Taungzat Gate hi motor a fami le a nganmi tiin khuakip ah an chuak. An chuahnak khua hna cu; Hakha le Thantlang kar, Hakha le Falam, Hakha le Kalay, Hakha le Mandalay, Hakha le Hnaring ti in an chuak. Hakha le Hnaring hi zarhkhat voithum (nihnih ni, nili le zarhte ni), fighter motor in an chuak, asinain mi tlungkal an um lo caan ahcun an chuah khawh lo caan zong a um. Khua dang paoh cu nifate in an chuak tiah gate tuanvo ngeitu sin in theih a si.

Na ruahning rak langhter ve.. (Leave a comment)

%d bloggers like this: