Hakha le Thantlang Karlak Ni 6 Chung Kahdohnak Ah SAC Ralkap 20 An Thi, 35 An I Hliam
The Chinland Post | 2023 July 10 — Chin ramkulh, Hakha le Thantlang karlak ah a cang mi SAC ralkap le CNA, CDF phufonh hna karlak ni 6 chung kahdohnak ah SAC ralkap 20 hrawng an thi i 35 an i hliam tiah CNA biachimnak nawl a ngeitu Salai Htet Ni nih a chim.
Hakha in Thantlang khua lei ah thazang chap ding in kahdohnak a tuah mi SAC ralkap pawl cu Tita pawnghrawng ah July 3 in July 8 tiang CNA, CDF phufonh nih an kah hna hi a si.
“A hlan ah ralkap 5 sizung an phan. Kahdohnak a daih ah 30 hrawng an phan chap. 20 hrawng an thi tiah an a thlithup thawngpang kan theih” tiah Salai Htet Ni nih Mizzima ah a chim.
July 8 tiang Hakha – Thantlang ramri, Tita dinhhmun pawnghrawng ah kahdohnak a chuak i July 9 ah CNA, CDF phufonh nih hmunhma zohfelnak an va ngeih tik ah SAC ralkap ruak 6 le meithal zuun 4 telh in kuanzen pawl an lak khawh tiah theih a si.
Kahdohnak chung ah SAC nih vanlei in voi 2 bom a thlak i Hakha lei SAC ralkap nih hriamngan kah an bawmh pah hna caah CNA, CDF phufonh lei 6 an i hliam tiah Salai Htet Ni nih a peh.
May 26 thawk in thazang 150 hrawng SAC ralkap pawl nih Hakha in phu 2 ṭhen in Thantlang lei an panh caah Timit pawngkam le Tita pawngkam ah CNA, CDF phufonh nih an kham hna hi a si.
