Hakha Le Thantlang Peng Laica Chimtu Rian Hmu Mi Ruah Ning In An Tlawm

Salai CungCung|2019 September 9| Hakha peng le Thantlang peng chung cozah sianginn ah Laica chimtu rian a hmu mi hna cu, Hakha peng in minung 56, Thantlang peng in minung 47 an si i ruah ning leng in rian a hmu mi an tlawm tiah CACC Art & Culture Department Pastor Lai Cung nih a chim.

“Hakha peng Cozah sianginn ah Laica chimh ding in minung 260 hrawng nih an sok i minung 56 lawng nih an hmuh. Kan mah nih minung 115 hrawg tal nih cun an hmu te lai tiah kan ruah nain minung 56 lawng nih an hmuh tik ah kan khuaruah har ngai ngai. Hi konghe pehtlai in cozah lei nih sianginn pakhat ah siangngakchia minung 10 in 100 kar lak um mi siangngakchia cu saya/ma pakhat pek siseh tiin rian an auh i tlangcung mi nunphung le coholh kongkau tawlreltu zung le fimcawnnak lei zung nih hnatlaknak an ngei. Cu ti hnatlaknak an ngeih ning tein kan pe hna seh law Hakha peng ah hin minung 115 hrawg nih an hmuh lai tiah zumhnak kan ngei. Cun Thangtlang peng ah minung 80 hrawg nih hmuh ding khi a si. Asinain minung 10 in 100 kar lak ah saya/ma pakhat timi cu si ti lo in an mah fimcawnnak zung lei nih sianginn pakhat ah Laica cawn dingmi taangthum tiang minung 40 an tlin lawng ah saya/ma pakhat kan pek hna lai tiin an policy kha an rak thlen rua, cucu kan rak theih ti lo, cu ruang ah sianginn tampi nih an hmuh lonak hi a si.” tiah Pastor Lai Cung nih TCP ah a chim.

“Hi rian hmuhnak le hmuh lonak kongkau ah hin a cheukhat nih kan mah CACC hi a kan zumh pah lo, CACC nih an pek hna, an pe hna lo, tin an kan lunghrinh. Hi rian pek le pek lo konghe pehtlaih in kan mah CAAC nih kan tuah khawh mi pakhat hmanh a um lo, nawl kan ngeih khawh mi zong zei hmanh a um lo, a ning tein an mah le rian an soknak form vial te kha cozah sin ah kan ap piak hna i cozah lei nih an rak tuah dih hnu ah kan sin ah an rak kan ap than hi a si. Kan mah nih a hmuh zong kan hmuh ter kho hna lo, hmuh lo in um ter khawh zong a si lo, kan mah min in cozah sin ah form lak piak le ap piak lawng khi si ko. A cheukhat cu kan sin ah an ra i kan nih sianginn kan hmu lo e, CACC nih nan kan chimh piak lo maw tiin hal mi tampi an um.

Hakha peng ah hin Sianginn 90 leng ah 30 hrawng lawng nih Laica chim rian an hmuh i sianginn 60 hrawg nih an hmu lo. CACC nih Laica chim rian hmuhnak kong le rian soknak kong ah Laica a tlai tu le a tuah tu an si nain cozah sianginn ah nawl ngeihnak an ngei lo, a sinin cozah sianginn ah Laica an cawn khawhnak ding rian a a bawm tu le a tuaktan tu an si. Hmailei ah rian hmuhnak le rian soknak kongkau zong an tawlrel piak peng rih hna lai tiah kan theih.+++