Hakha Mizapi Sin In Kachin Ralzaam Bawmchantu Phu Nih Ks. Sing 48 Renglo An Hmuh Cang
City Hunter| 2018 May 22| Ral ruang ah harnak a tongmi bawmhchanhnak caah Kachin Ralzaam Bawmchantu Phu (KRBP) nih Hakha mizapi sin ah tlawmhalnak an tuah i ks. sing 48 renglo an hmuh cang tiah tuanvo ngeitu upa hna sin in kan theih.
Hakha caah dirhmi ‘Kachin Ralzaam Bawmchantu Phu Chin’ committee cu May 21 zan, The Chinland Post zung ah meeting khuakhan lairelnak an ngei. Cu meeting khuakhan lairelnak ahcun ngunkeng le haotu nih atu bantuk in an chim.
“Kachin ralzaam bawmhchanhnak caah tiin Hakha mizapi sin ah tlawmhalnak in kan hmuhmi le atu kan kutcung ah tangka fang a lut cangmi zapi hi ks. 4,848,550 a si cang. Inn kip ah lut in tlawmhal kan ngeihmi hna zapi hi inn 608 an si. Riantuannak caah ks. 30,000 in 50,000 kar an hmanmi/an dihmi an zuh hnu ah kan kut cung ah a taangmi zapi hi ks. 4,848,550 a si”.
Bawmhnak an hmuhmi zapi cu KRBP committee chung in a kal khomi upa cheukhat Kachin ram ah va kal in hartongmi ralzaam- IDPs sin ah pek ding in khuakhan lairelnak an ngei. An kal tikah bawmhnak in hmuhmi chawva hman dih lo in mahte in tlunkalnak i rin bang ding zong in biakhiahnak an ngei. Cun, innkip ah vah ti lo in bochanmi upa le company ngeitu sin ah tlawmhalnak tuahchap ding zong biakhiahnak an ngei tiah kan theih.
Hakha lei tawlreltu KRBP Chin committee in haotu Salai Lal Nun Tluang nih, “Innkip vah cu kan ngol cang. Atu hi bochanmi upa le company ngeitu upa minung 20 kan thim hna i anmah sin ah tlawmhalnak kan tuah chap lai. May 22 zanlei, The Chinland Post zung ah kan tangka hmuhnak le hmannak siseh, zeitindah pekchanhnak kan tuah lai timi siseh, kan riantuannak mizapi nih an i fiannak ding le langhngannak a umnak ding caah thawngfianhnak (press conference) kan tuah lai” tiah The Chinland Post ah a chim.
“Hakha ah kan hmuhmi lawng si lo in KRBP Chin committee hi ramkip le hmunkip ah an rak dir cio ve. Cu chung in Delhi le Singapore nih tlawmhalnak an tuahmi chung in an hmuhmi vialte cu kanmah sin ah a kan kuat lai i kanmah nih kan va phorhpiak hna lai” tiah a biapeh ah a chimchap.
Hi kong he pehtlai in KRBP committee in ruahnak petu Rev. Tluang Ceu nih, “Hi Kachin bawmhnak rian hi ahotel in an kan tlangtlak in an kan tawlrelpi te hnga maw ti ka ruat nain zeihmanh a um lo. Cu lio ah atu bantuk in mino hna nih atu bantuk zaanghleicawi rian nan kan thawkpimi cung ah kaan lawmh tuk hna. Hi rian hi a fawi mi thil a si lo, cal saruh chawn bak in lenkai le vah a hau. Baptist paoh paoh cu a dangte in tlawmhal an si ve. Cu lak ah ks. sing 48 renglo nan hmuh cu ka ruahnak lengpi bak a si i ka khuaruah a har. Kaan lawmhpi tuk hna” tiah a chim.
Hi Kachin ralzaam bawmhchanhnak hi MBC le CBC tawlrelnak in Baptist Church paohpaoh cu a dangte in cabawm sanh in tlawmhal an si ve. Cu ruang ah Khrihfabu ah tlawmhal lo in innkip ah vak in tlawmhalnak an tuah zong hi a si tiah kan theih.
Ral ruang ah inn le lo a chuahtakmi Kachin ralzaam hi 6000 renglo an si. A luancia caan in ral ruang le ramchung himlonak ruang ah inn le lo a chuahtakmi, a zaamtakmi Kachin ralzaam zapi hi 100,000 hrawng an si cang tiah Aljazeera media nih a langhter. Hi cazin langhtermi cu chikkhat a zaammi si lo in hmundang le ramdang ah a tli, a zaam i khua a sa thai cangmi an tamdeuh tiah theih a si.
Atu lio Kawl ralkap le KIA i kahdohnak ruang ah harnak a tongmi Kachin miphun bawmhchanhnak caah ti in May 7 zan Hakha ah ‘Kachin Ralzaam Bawmchantu Phu Chin’ ti in committee an dirh. Hi Kachin Ralzaam bawmchantu Phu Chin timi committee hi Hakha lawng ah dirh a si lo, Malaysia, Australia, Singapore, India-Aizawl, Kalay, Falam le Mindat zong ah an rak dirh cio.
A hlankan in Khrihfabu sin ah siseh, tualchung media le social media in tlawmhalnak an tuah dingmi le an i tinhmi pawl thawngthanhnak an tuah hmasa. Cu hnu ah committee upa tawlrelnak he innkip ah vak in tlawmhalnak an ngeih hna hi a si.
Hakha, ‘Kachin Ralzaam Bawmchantu Phu Chin’ committee upa hna cu; Chairman ah Salai Lal Nun Tluang, Chairman bawmtu ah Salai Lian Bawi, Secretary ah Salai Chan hnin Thang, Secretary bawmtu ah Salai Johnret Thang, Treasurer ah Mai Ngun Thlia, Treasurer bawmtu ah Mai Tial Tha Chin, Treasurer bawmtu ah Salai Bawi Vel Sang, Accountant ah Salai Biak Peng Thang, Accountant bawmtu ah Mai Sung Chin Thluai le Salai Van Tin Sang, Ruahnak petu ah Salai Holy Tawk Tling Thang, Salai Jacob Thang le Rev. Tluang Ceu an si tiah kan theih.
About The Author
