Pu Thla Hre le Pi Iang Tial Independent Hluttaw in An I Cuh Lai_NLD in An Chuak

1

Pi Iang Tial le Pu Thla Hre

Salai Josephbawi| TCP-Hakha| August 1, 2020| 2020 Kawlram thimnak ah NLD aiawh in Hakha No.2 Amyotha Hluttaw in luh ding Cazin an pe nain NLD EC nih an thim lomi Pu Thla Hre le Pi Iang Tial hna cu Independent in 2020 Kawlram thimnak ah luh an itim tiah theih a si.

Pu Thla Hre hi Hakha Ramkulh (Pyine) hluttaw No.1 in cuh aa tim i Ramkulh No.2 in Pi Iang Tial aa tim ve.

August 1, 2020 zing Facebook ah Pu Thla Hre nih a tanglei bantuk a thanh “ Keimah cu Pu Thla Hre ka si. Hakha dawrhlun sang ah a chuakmi le a thangmi ka si. 2020 Thimnak ah Pyine No.1 me hmun in kaa zuam lai. Keicu party pakhat min aiawh in a si lo. Ka me hmun chung ka miphun vialte thleidan nak um loin a aiawh kho mi Independent in a si lai” tiah cuh aa timnak kong a thanh.

Pupa vawlei aum hrimhrim timi hi ka pommi asi.Pupa vawlei ngei I an sungh zatlaknak aumnak hnga lo ka dirpi lai. Kan khua, kan ram, kan miphun caah thiltha atuah mi cu ka bomh hna lai. Ziknawh le eihmuar nak nih kanram thancho nak a hrawh tuk caah ka doh hrimhrim lai. Santlailo le misifak zeihmanh a rel lo mi hruaitu, mizaapi caah a tha lo mi pi a tha ko a timi hruaitu, kanram, kan vawlei, kan khua, kan miphun a daw lo mi hruaitu cu ka doh hna lai tiah Pu Thla Hre nih a langhter chih.

Pi Iang Tial nih “Keimah hi Pension ka lak le cangka bak in NLD ah ka rak cawlcang cang.  2015-16 kum ah Senthang mino le sianghleirun pawl nih kan khua le ram thanchonak caah cun kanmah hrimhrim ramkhel ah kan ipaih ve a herh tiah an ruah i in  keimah le Pu Lian Ceu cu an icuh ahcun dirpi ding timi zong kan si tikah NLD upa cheukhat le Chairman Pu Zo Bawi kan len hna. Pakhat paoh cu kan itel te lai tiah kan ruah nain NLD EC lei in an kan thim lo tikah kan lung a tha lo ngai. NLD EC chung va buai lennak cha cun tiah tanpitu le Independent dirding thapetu an um ko caah Hakha Ramkulh hluttaw No.2 in ka cuhnak hi a si.” tiah The Chinland Post ah a chim.

“Pu Thla Hre le Pi Iang Tial cu Independent in cuh an itim I NLD ah Party in chuahnak ca an tin i lungthiang tein kan cohlan hna. Kan karlak ah zei buainak kan ngei lo” tiah NLD Chairman Pu Zo Bawi nih The Chinland Post ah a chim.

Pu Thla Hre Independent in a luhnak Hakha Ramkulh Hluttaw No.1 ahhin NLD in Pu Sony Thang Cung, CNLD in Salai Van Chan Ceu, USDP in Phiar Mawng, UDP in Sayamahkyi Thla Iang siseh Pi Iang Tial aa zuamnak Hakha Ramkulh Hluttaw No.2 in NLD in Pu Sui Thio, CNLD in Pu Siang Mang, UDP in Pu Ram Peng le USDP in Pu Ngun Khar hna an si lai.

About The Author

1 thought on “Pu Thla Hre le Pi Iang Tial Independent Hluttaw in An I Cuh Lai_NLD in An Chuak

Na ruahning rak langhter ve.. (Leave a comment)

%d bloggers like this: