Hakha Parthlam Le Lawng Innka Sakmi Daw Aung San Suu Kyi Nih Hunnak A Tuah Lai

Tawk Tling Thang | 2019 January 20| Hakha Gangaw lam i khuacuanhnak (view point) Parthlam (Tower) le Lawng Innka sakmi cu Myanmar rampi ruahnak petu Daw Aung San Suu Kyi nih January 21 zingka suimilam 7:00 ah hunnak a tuah lai.

Hi kong he pehtlai in Chin ramkulh Sipin Director zong a si i hi tower saknak committee chairman zong a si chihmi Pu Thla Hre nih atu bantuk in The Chinland Post ah a chim.

“Khuacuanh tlang i Parthlam (Tower) le Lawng Innka kan sakmi cu kan lim cang caah Myanmar rampi ruahnak petu Daw Aung San Suu Kyi nih January 21 zingka suimilam 7:00 ah hunnak a kan tuahpiak lai. Hi Tower le Lawng Innka hi cozah budget fangkhat hmanh tel lo in kan sakmi a si. Hi tower le Lawng Innka hi cozah (Sipin) nih a sakmi a si lo, a dangte in tawlreltu committee ser in kan sakmi a si”.

Hakha Lawng Innka sakmi

Hi Parthlam le Lawng Innka cu Myanmar rampi Vice President Henry Van Thio nih ks. Sing 50 (5,000,000) hramhbunh hmasa nakin sak thawkmi a si. 2017 April 1 in Power Seven company nih sak hram a thawk. Hi Parthlam le Lawng Innka saknak tangka hi cozah budget fangkhat hmanh tel lo, ramchung Chin upa hna bawmhnak in sakmi a si. Chawva chuahtu, kutsamhtu zapi hi Vice President Henry Van Thio telh in nunsiangmi minung 64 an si. Tangka fang in a zapi ks. 64,580,000 a si tiah kan theih.

“Parthlam chung ah chawva kutsamhtu cazin kan taar. Cun, a leng ah khin Henry Van Thio Tower tiah ca kan tial in kan taar chap rih lai. Hi khuacuanhnak Lawng Innka ahhin Chin ramkulh in bochanmi le philh awk a tha lomi upa kan thim hna lai i an zukdeu le an konglam zong tialpiak chih dih ding hi kan saduhthah a si. Hihi pehzulh in tuanchuah kan i zuam lai” tiah Pu Thla Hre nih a biapeh ah a chimchih.

Vice President Henry Van Thio le ramkomh minister cheukhat nih January 18 ahkhan Tikir an kallei Hakha an phak lio ah Hakha Parthlam le Lawng Innka sakmi cu an zoh. Tutan hunnak zong ah an i tel thiamthiam lai tiah theih a si.

Parthlam le Lawng Innka saknak caah kutsamhtu cazin

Hakha Gangaw lam khuacuanhnak Parthlam le Lawng Innka chung luh khawh caan hi zing suimilam 6:00 in zan suimilam 9:00 tiang a si. Hiti ri an khiahmi hi a chung lutmi hna nih dingrep an ngeih tawn lo caah a si. Atu tiang cu a chung luh man (fee) laak a um rih lo. Hmailei ahcun dingrep a um deuhnak ding le an sunhsak deuhnak ding ah a man laakte ding zong timhtuahnak an ngei tiah kan theih.

Na ruahning rak langhter ve.. (Leave a comment)

%d bloggers like this: