Hakha peng ah Mizapi nih Zatlang Uknak an dirh

0

Photo credit: Salai Joseph

Chinland Post| 2022 February 1 — Ralkap nih hramhram in nawlngeihnak an lak kum 1 a tlin ni ah Chin ramkulh khualipi Hakha khuapi chung a ummi le Pengtlang hna fonh in, Caan Karlak Hakha Peng Zatlang Uknak dirh a sinak cu thawngthannak ca nambar 1/2022 in an chuah tiah kan theih.

Hi thannak kong he pehtlai in, ahodah pehtlaih ding timi langhternak an tuah lo. Nain, a tanglei ah cathanh an chuahmi Laica le Kawlca in rel khawh a si.

Cawlcanghnak kong a theimi minlanghter duhlomi pakhat nih, atu ah Hakha peng chung ah ah Ralkap le a ralhrang nih nawl an ngeih khawhnak, an uk khawhnak cu Hakha khuapi chung telawng a si cang. Cu hmanh cu an i harh! Cucaah, khuate lei hmun kip ah cawlcanghnak le ihruainak a um khawhnak hnga ding caah atu bantuk in mizapi uknak hi an dirh thawknak a si lai tiah a hmuhning a chim.

Caan Karlak Hakha Peng Zatlang Uknak Dirhnak Kong

Thawngthanhnak
No. 1/2022

Nithla: 2022 Nohawng 01

1. Rammi mizapi duhnak he ralchanh in ralhrang phu nih hramhram in rampi nawlngeihnak an laknak kum khat a tling cang. Hramhram in nawlngeihnak an laknak cu Kawlram mizapi nih kan cohlang lo. Chinland ramchung, Hakha peng mizapi zong nih kan cohlang lo. Cucaah a lamkip in duh lonak langhter a si i, hriamnam tlai in dohthlennak a tuah mi dirhmun tiang kan phan.

2. Mizapi nawlngeihnak hramhram in laknak nih zapi nun-khuasaknak le chawleh chawhrawlnak fakpi in a ṭumchukter. Innlo tampi hrawhpiak kan tong i, rammi tampi umnak ngei loin ral kan zam. An duh paoh in rammi an kan tlaih, an kan hrem i mizapi thisen tampi a luang.

3. Ralhrang nih an nawlngeihnak an fehter khawh nakhnga lo le an hlawh a tlin nakhnga lo, rammi kan dihlak nih lungrual tein kan dohthlen lio a si. Cucaah kanmah kan kong cu kanmah tein kan i tawlrel i kan i ukhruai khawh nakhnga, Hakha khuapi chung le Pengtlang hna telh in, “Caan Karlak Hakha Peng Zatlang Uknak” (Interim Hakha Township Administration) cu dirh a si cang, tiah thawng kan in thanh hna.

4. Hramhram uknak lak le namneh uknak phun paohpaoh cu kan duh lo caah, Caan Karlak Hakha Peng Zatlang Uknak nih 2022 Nohawng 1 thok in kan tei hlan tiang dohthlennak cu pehzulh in kan ṭuan lai. Cun, Federal Democracy Ram sersiamnak caah le Hakha peng chung ukhruainak he aa pehtlai mi thil vialte cu “Caan Karlak Hakha Peng Zatlang Uknak” nih ṭuanvo la in tawlrel a si cang lai.

Caan Karlak Hakha Peng Zatlang Uknak

About The Author

Na ruahning rak langhter ve.. (Leave a comment)

%d bloggers like this: