Hakha Peng Facility Quarantine a Lutmi Nu Pakhat Sinah Covid Hrik An Hmuh

Salai Bawi Lian Sang| TCP-Kalay| October 12, 2020| Hakha peng nu kutzumthiamcawnnak sianginn ah facility Quarantine a lut mi Nu (1) kum-22 sin ah covid hrik an hmuh tiah October 10, 2020 zan in thawng theih a si.

Covid-19 zawtnak positive nu hi Yagon ramthen, Alone peng Bahu Nurse (Bahu- taphua) training school No. (162) a kai dih hnu Chinram lei ah riantuan ding in A hawi le nurse sayamah (3) he September 27,2020 ah Hakha lei an rak kai. September 28, 2020 ah Hakha lutnak  Gangaw lam check gate in nu kutzung thiamnak sianginn ah Facility Quarantine in an erh colh hna. October 8, 2020 ni ah Swab test an tuah hna i covid-19 hrik an ngei kho tiah lunghrimh mi cu Hakha siizung ah a mah lawng umnak kham dang te an chiah. Swab test an tuahmi cu Mandalay ah October 9.2020 ah an kuat . October 10, 2020 ni Myanmar ram Ngandamnak le lentecelhnak zung thawngthanhnak ah zawtnak hrik an hmuh kong theih a si.

Atu zawtnak an hmuhmi nu cu Hakha siizung ah sii a thlop lio. A mah he neihniam ummi saya(3) zong Nukutzung thiamnak sianginn ah facility quarantine erh a si  i Swab test an tuah hna tiah Hakha covid-19 pulrai runvennak committee in thawng kan theih.

Hakha pengkulh chungin ramchung ramleng a rak lutmi hna cu Facility Quarantine hmun (4) ah chiah an si. Hakha University  Facility Quarantine, G.T.I Facility Quarantine ,Nahtahlah sianginn Facility Quarantine, Nu kutzum thiam cawnnak sianginn Facility Quarantine ah chiah an si tiah Hakha Covid-19 pulralvennak committee sinin thawng theih a si.

Chinram kulh Covid hrik ngei( 44) le a damthan minung ( 15) an si cang tiah October 10, 2020 zan in thawng theih a si. Mindat peng ah zawtnak ngei (20), adamthan minung(1), Tedim peng zawtngak ngei (10), a damthan minung (8), Tonzang peng zawtnak ngei (9), adamthan minung(4), Hakha peng zawtnak ngei (1) le a damthan minung(1), Thantlang peng zawtnak ngei ( 1) le a damthan minung (1)Falam peng(1) le Matupi (2) ah  a thimi(1)  hna an si.

Na ruahning rak langhter ve.. (Leave a comment)

%d bloggers like this: