Hakha peng kahdohnak ah CNA/CDF in 9 nih nunnak an pek, Ralhrang 20 tluk thah an si

The Chinland Post | 2022 May 5 – Hakha khua in Falam lei ah rahrang raldohnak tank 2 le mawṭaw 27 in aa thawhmi SAC Ralhrang ralkap le Chinland Defense Force (CDF) le Chin National Army (CNA) karlak kahdohnak in May 5 ah miphun hriamtlai CNA/CDF lei in minung 9 nih ram caah an nunnak an pek tiah theih a si.

Tutan nithum chung kahdohnak ah, Kawl Ralhrang Ralkap lei in a tlawm bik 18 [tluk] cu thah an si cang. Hinak in a tam zong an si kho men tiah theih a si.

Cun, Ralhrang lei nih an sungh tik poah ah an tuahmi mipi harsat peknak le lungdongh ternak ah inn 16 tluk Tlangzaar khua ah an khangh cang tiah Ral raungah a cangmi hlathlaitu sin in kan theih.

Tutan kahdohnak hi Hakha le Falam karlak Tlangzaar khua pawngah a cang cuahmah mi a si.

CNA lei upa lei deuh simi bawi pakhat telh in minung 6 le CDF minung 3 nih ram caah a nunnak an pek hi a si tiah theih a si.

Kahdohnak a pawngkam khua a simi Tlangzaar khua he, a kiangkap simi Ramthlo khua ah inn tampi zong SAC ralkap nih mei in an khangh tiah theih a si.

A cang cuahmah lio mi a si caah, thawng tling le a thilo mi kong ah felfai deuh in thanh khawh kan izuam than lai.

Updated at: 10:30 pm

Kawl ralkap nih hramhram uknak an lak hnu in, a hnu bik theihmi tiang ah, Ramthlo ram ah Chin Miphun ralkap arfi hna milu a liam zah hi ka palh lo ahcun mipum 13 an si” tiah Salai Thawngpi timi nih a tial.

Nihin 2022 May 5 ni thengte ah miphun ralkap 9 nih ram ca nunnak an pekchanh. Pathian nih Chinram le Chin miphun kan veng ko sawh seh. Pathian dah ti lo hnem khotu an um lo tiah a ngaihchiatnak cu Thantlang ah biacaihbawi rak tuanbalmi Salai Thawngpi nih a tial.

Cun, nihin tiang ah Hakha le Falam karlak ah ummi Khua thum; Ramthlo, Tlangzar le Dokt’hek khua 3 fonh inn 43 tluk an khangh cang tiah theih a si.

Na ruahning rak langhter ve.. (Leave a comment)

%d bloggers like this: