Hakha peng thimfung thlatu milurel tuaktaannak: Independent in a dir ding an hung lar?

Editorial| The Chinland Post, 2020 July 31

Chin ramkulh khualipi ah ruahnak leng in 2020 November thimnak ah luh a timmi an hung tam.

Cozah a tlai lio mi, NLD nih a zuam dingmi cazin an fian hlan tiang ahcun, thimnak ah luh ding in dir a timmi thawngpang a leng tuk lem lo. Asinain, NLD nih an minung an hun thanh le cangka in thimnak ah luh a duhmi an karh i, ngatefuan bang an hung fuan.

Zauk phung nih a chuahpimi thilhran thar pakhat a si tiah hei ruat ko u sih.

Asinain, zauk phung ningcang tein (democratic process) in Party ah MP cuhnak nawl (ticket) an hal i, thimfung an thlak hna hnu ah, a sungmi ‘Independent’ in ka dir than lai a timi cu zauk phung sining he a kalh deuhmi an si tiah ruah khawh an si lai dah. Phundang cun, mumal ngei (principles) lo an si hnga! A um kho ve mi cu, Party EC nih an tawlrelning ruang zong ah a si kho.

Asinain, a cuh dingmi pumpak nih miphun caah teinak hmuh duhmi an si ko ahcun, an biakhiahnak hi felfai deuh in an ruah a herh. Miphun caah tiah biatung dirh tung i, pumpak hlawknak menmen le thutdan lawng a ruatmi an si sual ahcun, a poi ngaingai.

Photo credit: Salai Joseph

Cucu, thimfung thlatu milurel in hun zoh ah a fiang ngaingai lai dah. Hakha peng ahhin, thimfung thlaknak hmun hnih (Constituency no. 1 le no. 2) tiah then a si.

Hakha peng ningpi ahhin, Khuate le Sang fonh 68 a um i, thimfung thla khomi 39,696 kan um.

Cucu, Pyithu Hluttaw a cuh dingmi nih aiawh dingmi a si. Hakha peng ahcun, Pyithu Hluttaw lawnglawng hi, a peng ningpi in aiawhtu ding a si. Phun dang chim ahcun, Hakha peng chung mizapi (thimfung thlaknak nawl ngei) nih kan thim dingmi a si. Amahbel, Ramkulh (Pyine) le Amyotha ahcun, an then.

Cucaah, thimfung thlaknak hmun no. 1 (Constituency no. 1) ahhin thimfung 19,223 a um.

Cuchung ah, Hakha khuachung in Dawrhlun ah 1801, Pyidawtha ah 3258, Khuathar ah 4040, Khuahlun ah 242, Hakhathar no.1 ah 1249 le Hakhathar no. 2 ah 1756 thimfung thaltu ding an um. Cucaah, No. 1 in Hakha khuachung sang fonh hi thimfung thla khotu an zapi 12,346 an si. Cun, Mi-e peng le Zokhua peng in an si; Mi-e peng in khua 21 fonh ah thimfung 4746 a um i Zokhua peng ah thimfung 2131 lawng a um. Mi-e le Zokhua peng fonh ahhin, 6877 a um. Khuate lei ah, cheuthum ah cheukhat lawng a um tinak a si.

Cun, thimfung thlaknak hmun no. 2 (Constituency no. 2) ahhin, 20,473 a um.

Hi chung ahhin, Hakha khuachung in Dawrthar sang zapi ah 9644 le Cawbuk Sang ah 1681 a um. Khuachung a sang pahnih fonh lawng ah 11,325 thimfung a um. Amahbel, Senthang peng khua 33 ahhin, thimfung 9148 a um i a tlawmtam a thlau tuk lo.

Cucaah, a cunglei thimfung thla khotu milurel sining kan zoh tik ah, pumpak (independent) in a dir dingmi caah a fawi lai maw fawi lo timi tuaktaan khawh a si. Cun, a hlei khun in atulio ah a hunglinsa ngaimi hmunhma thimfung thlaknak no. 2 hi thil fian a har ngai dingmi dirhmun a phan.

August 7 hlan tiang ahcun, biafiang cu a si rih lai lo nain, tachunnak ah Pyine (Ramkulh) Hluttaw in Thimfung hmun no. 2 ahhin, a zuam dingmi minung 5 tluk an si cang. Kan theih khawh vial ah, NLD in Pu Sui Thio, CNLD in Pu Siang Mang, UDP in Pu Ram Peng, USDP in Pu Ngun Khar le Pi Iang Tial (Independent) in an si lai.

Cucaah, pumpak ‘independent’ in a dir dingmi nih an tuaktaan dingmi cu teinak hmu khotu an si lai maw? A silo ah, Spoiler timi hrawkhraltu sawhsawh dah an si lai timi an ruah ngaingai a haumi a si.

Na ruahning rak langhter ve.. (Leave a comment)

%d bloggers like this: