Hakha Pu Za Tling Inn Mifir Nih An Bauh I Ks. Sing 35 Hrawng An Fir

MYANMAR-ECONOMY

City Hunter| 2018 June 26| Hakha, Pyidawtha sang ah a ummi Pu Za Tling inn cu June 24, Sunday zing pumh karlak ah mifir nih an bauh i ks. sing 35 hrawng an firpiak hna tiah kan theih.

Hi kong he pehtlai in inn ngeitu Pu Za Tling fapa- Saya Tluang Thang Bik nih, “Kan inn an bauh hi June 24, Sunday zing pumh karlak ah a si. Coka lei innka in an bauh i innpi le ihnak khaan inka zong an bauh chih. Coka hi a lenglei in hrenhmi zong a si lo, a chunglei in hrenhmi a si. Innchung ah tangka kan chiahmi ks. sing 35 hrawng a kan firpiak” tiah The Chinland Post ah a chim.

“Hi kong hi palek zong thawng kan thanh colh hna i an rak zoh colh ve. Asinain nihin tiang cu mi zeidah an si timi kan hngal kho rih hna lo. Hi bantuk in mifr an vah cu i ralrin taktak cio a herh” tiah a biapeh ah a chimchih.

Pu Za Tling inn cu Hakha Pyidawtha sang, IBC biakinn thlang, Cherry lam cung ah a ummi a si. Hi inn ah khua a sami cu inn ngeitu Pu Za Tling le Pi Hram Hniang, an fapa Saya Tluang Thang Bik le a nupi le a fa he an zapi minung 5 an um. An zapite in an i pumh karah atu bantuk in mifir nih inn an bauh le an tangka an firpiak hna hi a si. Pumh dih hnu lawng ah inn an bauh le mifir nih tangka an firpiak hna hi an theih.

Atu lawng si lo in Hakha ah inn bauh, dawrkhaan bauh i thil fir le cycle fir tibantuk in voi tam nawn a chuak cang. 2016 November 5 zan sml. 7:00 ah Chin ramkulh khualipi Hakha ah mifir minung 7 an tlaih bal cang hna. HAKHA Dawrhlun sang ah Pi Cer Iang (Par Chin Nu) dawr cu 2017 February 7, zan Sml. 11:30 hrawng ah an bauh i a zan ah a bohtu cu Pi Mah Nge inn tang ah kan va tlaih khawh.

2017 February 6, zan Sml. 10 hrawng ah Pyidawta sang dawr thum zong mifr nih an bauhpiak hna. February 6 zan Pyidawtha sang dawrkhan pakhat an bauhpiakmi cu Cinkhua mi Nu Khen a si. Inn ngeitu hi Pu Kap Cung a si. Tamhnak le ngakchia lentecelhnak tibantuk a zuarmi a si. Tangka bawm chung ah a chiahtakmi ks. 10000 hrawng an firpiak chih tiah kan theih. +++

Na ruahning rak langhter ve.. (Leave a comment)

%d bloggers like this: