Hakha Pyidawtha Market Sak Ding Ramkomh Sohlohyee Lutlai Le Chin Ramkulh Chief Minister An I Tong
Salai Ngun San Aung| 2018 May 3| Chin ramkulh Khuahlipi Hakha ah Pyidawtha market (Myoma market) inn pi cu sing 9000 in sak dingah Chin ramkulh cozah in tuanvo ngei nih Excel Design Development Company a pek nain felfai tein an tuan khawh lo caah ngolter an si i ramkomh sohlohyee nih sak piak ding in sohlohyee Director le Chin ramkulh Chief Minister tonnak an ngei cang tiah kan theih.
“April 29 ah khan Myanmar Ramkomh Sohlohyee Director pa le Engineer he Hakha Pyidaungsuh khualbuk ah tonnak kan ngei. Chief Minister Salai Lian Luai zong aa tel. Zeitik in rian domh ding ti cu biachah a silo nain a rang bik in domh khawh ding i ruahceih a si. Sipin budget in sing 6000 le dawrkhan zuarman sing 3000 a dihlak sing 9000 dih in sak a si lai i dot thum le cheu a si lai” tiah Chin ramkulh Sipin Director Pu Thla Hre nih TCP ah a chim.
Hi kong ah Pyidawtha sang upa pakhat nih, “hihi Sipin Minister Salai Isaac Khen nih Excel Design Development Company a pek mi hna a si. Chin ramkulh cozah le company pawl tonnak kan ngeih lio ah fiangtein hihi keimah nih ka pek mi hna a si, keimah nih 100% tuanvo ka lak tiah Sipin Minister nih a rak chim. Hi company hi Laitlang chung khuazei ah inn an sa bal ti zong kan hngal lo. Hmuhtonnak an ngeih le ngeih lonak zong kan hngal lo. Catlap cung an tial mi lawng zoh in rian an pek hna i a tak in rian an tuan tikah zeihmanh an si lo a lang. Kha rian a tuantu pawl kha bia an hal hna tikah zeihmanh zong leh khawh mi an ngei lo. Hi tluk Hakha pi, a hlei in Pyidawtha sang caah a biapi mi inn pi tu tiang hi bantuk in aa bangbat mi hi zeitluk in dah kan sungh. Mizapi hrim hrim an ing a puangtuk, rak kan hrihhawh ulaw lam zawh in kan duhnak kan langhter lai a timi hrim an tam tuk cang. Cung lei zung lutlai upa pawl sinah cah ka duhmi cu rian nan pek hna tikah tu hlan ah zeidah an tuan, a tak ah zeidah an lawh timi hngalh loin catlap cung lawng in rian kan pek piak ti hna hlah uh tiah chim ka duh” tiah TCP ah a chim.
Pyidawtha Market ah tihang le sa pawl a zuar mi hna cu Pu Kio Mang certual ah thial chung an si tikah harnak tampi an tong tiah kan theih. Kan zuarmi hi an hringso deuh an si tikah a thu man mi hrim hrim a tam tuk. Thil kan manh lo i kanmah lawng hi bia kan i ruah hna i a si ko tiah dawr ngei pawl nih an tonmi harnak kong zong an chim. Hi kong ah Excel Design Development Company nih an hman cia mi tangka sing 700 tluk zong a um cang i zeitindah tawlrel a si lai timi kong hi fiang in theih khawh a si lo. Hi kongah tuanvo ngei bik Sipin Minister Salai Isaac Khen cu amah pumpak pehtlaih khawh a si lo caah fiang in kan langhter kho lo. +++
About The Author
