Hakha- Pyidawtha Sang Pu Khar Nawn Inn Cu Chunlai Pi Ah A Kaang
City Hunter| 2018 March 25| Hakha ah Pu Khar Nawn inn cu March 25 (Sunday) chun suimilam 2:40 hrawng ah a kaang. A inn ningpi in a ziamh dih manh hlan ah mei an phelh khawh than tiah kan theih.
Pu Khar Nawn inn hi Hakha, Pyidawtha sang, Bogyoke lampi cung- Lunghleiva kam te ah a ummi Hakha lamtonnak (laansone) chak te ah a um. Inn hi dawrkhaan telh chih in dotli a si. Inn a kanghnak hi a dothnihnak in aa thawk.
Inn dothnihnak ah a ummi hi cycle a remhmi Kaung Kyaw te chungkhar an si. Inn dothnihnak a ummi U Kaung Kyaw te coka rawlchuannak pawng-oo in kangh hram aa thawk. Zeitindah a kanghning a si ti cu fiangte in hngalh le fehter khawh rih a si lo. Asinain Pawng-oo rawlchuannak i mei a sawtmi in a kaang timi tu cu hngalh a si. Mei kangh hram aa thawk ahhin anmah Kaung Kyaw te chungkhar innchung ah an um lo. An innchung mei a hut dih hnu le mei aa erh dih hnu lawng ah an theih. Cu cangka cun innpa chakthlang le lam aa chokmi nih baltin in ti an than chommi in an toih. Cu tlawmpal ah Hakah meithat zung in meithat motor pahnih an ra i inn cu a tlaih dih hlan le a kangh dih taktak hlan ah an hmih khawh than. Hi mei kangh ruang ah aa hliammi le a thimi cu an um lo.
Meithat motor pahnih lawng si lo in motor fami pahnih zong nih an bawmhchih hna. Kaung Kyaw te chungkhar an thilri vialte cu a kaang, a rawk pah dih. Inn cung dawrkhar hi inn an bauhnak le ti an toihnak ah tlawmpal thilri a rawk. Kaung Kyaw te inn tang ah a ummi Anna Cycle thilri zuarnak belte cu a kang manh lo. Asinain inncung ti an toihnak ah dawrthil vialte a cin dih tiah theih a si.
Hi kong he pehtlai in Hakha palek zung in tuanvo ngeitu pakhat nih, “Zeitindah dantat a si lai cu ahmuh tuah hnu lawng ah aa fiang te lai. Amah belte cu keimah ruahnak ahcun mei daithlan ahmuh a si ko lai” tiah The Chinland Post ah a chim.
Inn ngeitu Pu Khar Nawn te hi an chungkhar in Mandalay ah khua an sa. An inn hi a dotli ning in mi an hlanh hna.
Inn a kanghnak dot ah a ummi Kaung Kyaw te chungkhar an riantuantu he anmah chung he minung 6 leng an si. An umnak inn he aa pehmi inn tang ah cycle remhnak an dawrkhar cu a si. An thilri umkheng, angki, puan, fenh-aih tibantk in a ut dih, a kaang pah dih. An inverter, an TV, an battery tibantuk zong an kaang pah dih. Innchung thilri vialte cu a kaangmi le a himmi he leng ah an chuah dih.
Pyidawtha sang upa pakhat nih, “Hi inn a kanghmi an hmih manh cun vanchiat lei vanthat tiah kan van a tha tuk hringhran. Hi inn hi kaang dih sual sehlaw Pyidawtha cu kan sang ning in a kaang dih khomi a si. Inn aa peh dih caah. Kumkhat zong ah a rak kaang bal cang i inn 20 renglo a kaang bal cang, Pyidawtha sang ah” tiah The Chinland Post ah a chim.
Biakilh: Thil sining fiang deuh in kan hlat khawh tikah kan hun tial chap than te lai.
About The Author
