Hakha Ralkap Tidil Ah Pangpar Phun 27 An Cin Cang
Salai Cung Cung |2018 July 20| Chin ramkulh Sipin zung tawrelnak in Hakha ralkap tidil pangpar dum ah pangpar phun 27 an cin cang taih kan theih.
Hi pangpar dum cu Chin ramkulh Hakha Sipin tawrelnak in pangpar phun 27 an cin cang. Cu pangpar min pawl cinmi hna cu tanglei bantuk in a si.
“Chokhlei par hi Chin ramkulh hluttaw Chairman Pu Zo Bawi nih kung 100 cin ding a kan ti i amah pumpak in pangpar cinnak ding hmunhma zong a sersiam. Cherry kung hi kum 100 cin ding ah Pu Chan Fiang nih a kan ti. Saisua par hi Pu Thla Hre nih kung 30, Dardin le Duh Mang par hi khuachung nule pa hna nih kung 20, Ainawn par hi kung 50, Wedding par hi 50, meipar 30, Bethel par 50, Ever Green par, Ever red, Welcome par 8, Suimilam pahra le cheu par kungkhat, Kiss me par kungkhat, Hriangkung par kung 30 an si. A dang pawl hi pangpar min kan hngalh khawh dih rih lo caah midang sin ah kan hal than te hna lai” tiah Pangpar dum zohkhenhtu Pu Thawng Vung nih The Chinland post ah a chim.
“Hi bantuk in kan Chin ramkulh Hakha minister pawl nih anmah pumpak te in kan Hakha dawhternak dingah thil an tuahmi hi lunghmui tuk. Hi pangpar pawl kan cinmi hi kan Lai phung ah tuanbia ngeihmi lawngte an si caah hmailei zongah tuanbia ngeimi pangpar a dangdang pawl Dingdi par tibantuk tampi kan cin chap te lai” tiah a biapeh a chim.
Atu cu tidil kapkhat leikap lawng an cin rih, an cin rihlonak kapkhat lei zong an cin chap te lai tiah kan theih.
Dawrhlun sang palektalen ralkap tidil i tuahmi pangpar dum a lutchuak mi nih thianghlim tein um cio ding le kiangkap minung caah hnahnawhnak pek lo ding in zulh awk ding panga thawngthanhnak an tuah. Cu thawngthanhnak an tuahmi ah cun;
(1) Pangpar dum ah luhchuah khawh caan zing 6:00 in zanlei 5:00 tiang.
(2) Pangpar dum chungah kunya khai lo ding, kuak zuk lo ding le hnawm hlonh lo ding.
(3) Pangpar dum chung ah riithaisii le zukhmuam pawl zeihmanh tonghtham lo ding, au khuan lo ding, cycle tawl bak lo ding.
(4) Pangpar dum chung ummi pangpar tawh lo ding, pangpar kung khiah le thil hrawhhral lo ding.
(5) Tidil chung ummi thilnung zeihmanh tlaih le thah lo ding, ti i lio lo ding an si.
Hi zulhphung tuahmi a zul lotu paoh cu upadi ning in fakpi in sualphawt le dantat an si lai tiah thawng an thanhmi ah ralrin peknak an telh chih. +++
About The Author
