Hakha Rikhuantlang Airport Tuahding Dr. Sa Sa Bawmh Kan Hal Lai_Hakha Khuanu Khuapa

Dr.Sasa Hakha Khuanu Khuapa nih Puanpi aihlio/TCP

TCP Hakha| 2020 January 22| Hakha Khuanu Khuapa 2020 kum hramthok meeting CACC Zung, Hakha 2020 January 18 biachahningin Chin ramkulh Lailenpi Airport a dih le cangka in Hakha Rikhuantlang Airport ser kho ding in Dr.Sa Sa bawmhhal ding timi le Hakha khuachung thanchonak he aa pehtlai mi biachahnak tampi an ngei tiah theih a si.

“Dr. Sasa he bawmh in Rikhuantlang ah Mini Airport tuah ding bawmhhalnak kan tuah lai tiah bia kan chah. Amah hrim nih Hakha aphak lio ah kaphnih bawmchannak in le Hakha khuanupa lei bawmhhalnak a um ahcun kaa zuam lai a kan timi a si. Hakha zong Hakha University kan ngeih cang caah fimcawnnak le ngandamnak kong ah Airport ngeihlo awk kan tha tilo. April 2020 ah Lailenpi Airport a dih ahcun cawlcanghnak kan ngei colh ko lai” tiah Hakha khuanu khuapa Asst. Secretary Pu Ral Kham nih The Chinland Post ah a chim.

” Hakha Rikhuantlang Airport cu 2014 kum US lei an rak zoh lio pe 5100x pe 350 an kan tah piak cia cangmi a si. Janpan he kan zoh cang thli kal le hmunhma zong a tha an kan ti.” tiah a biapeh ah a chim.

Airport kong an chahmi leng in Timit Dinti hi din felfai tein a ngah khawhnak ding, a ngah lo sual ahcun Laikua dinti hman a herhnak kong, Matupi-Hakha ramri kongah Hakha pengah Zawngnak le Matupi peng ah Anta khua chiah ding Cozah sin catialnak kong, Hakha ah  phungninglo Zu phorh le zu zuarnak License a ngei le ngeilo, zu an zuarmi quality le OB a zuarmi hna tlaihnak tbk Uknak lei, Palek lei, FDA le rianngeitu hna he ibawm in chekhlat an timhnak kong, Hakha khuachung Motor car ningcang lo an chiahmi le adirmi hna kong, Dawrthar hi Sang 3 ah thenpiak ding hal ding tbk meeting biachahnak hna an ngei tiah theih a si. +++

 

Na ruahning rak langhter ve.. (Leave a comment)

%d bloggers like this: