Hakha Sangthar Ekah 100 Samhmi Innhmun 200 Tlamtling Tein Mee Zuhnak An Tuah

0

Salai Aung| 2018 February 15| Chin ramkulh cozah nih Hakha sangthar samhmi ekah 100 chung innhmun 200 cu 2018 February 14 ah tlamtling tein mee zuhnak an tuah khawh.

Hi innhmun mee zuhnak tuah lio ah hin Chin ramkulh cozah zung in Chief Minister, Lamsul lei Minister, Ramri runvennak minister, Sipin minister le Hluttaw Speaker hna an i tel kho. Hakha khuapi sersiamnak committee chairman, Sipin Minister Salai Isaac Khen le Hakha pengkomh uknak zung lutlai nih tutan inn hmun pek mi pawl nih midang sin ah zuar chin lo ding le zeitin anmah ta sinak ding tuah piak an si lai nak kong zong an chim.

“Hakha ah hin inn ngei lo 1000 fai an um tiah cazin ning in kan hngalh. Tutan ah inn hmun a sokmi hi 1196 an si. Hi leng in a dang zong an um pah kho men. Asinain Hakha milu le inn tung kan tuak tik ah hi zat inn ngeih lo hi a zualhma tuk cu kan si lo. Sihmanhsehlaw tu lio kan tlawmtlam tuak in 2000 fai hna nih inn ngei lo hei si usilaw cucu khuapi nincan lonak a si ti khawh a si hnga. Cun tutan rian kan vun lim hin a thar in sangdang kan samh than lai i duhsah te tein inn ngei lo harnak le buainak hi remh khawh kan i zuam ko lai. Tu innhmuh a ngahmi pawl nih hin kum 10 chung ah zuar asilo ah midang kut phak ter tibantuk a um ahcun fak piin dan tat an si lai. Cubantuk thil a um sual le nan theih ahcun a rang bik in thawng kan thanh uh. Tangka ngei mirum sinah inn hmun phak dih i innhmun man van tawng in kai te hna kha a um ti hnga lo nak le inn hmun man a fak tuk mi zong zeimawzat aa nincan khawh nak ding kan i zuam lai. Cun tutan inn hmun pek mi cungah midang pakhat khat nih kan pupa ram a si, keimah vawlei a si tibantuk in buaibai nak a um sual ahcun thawng kan thanh ulaw kanmah nih tuanvo kan lak dih lai. A ruang cu khuanu khuapa he i bawm in committee nih felfai tein tlangtlak le tawlrel hnu ah innhmun hi mizapi sin kan phak ter mi a si” tiah an chim.

Innhmun mee zuh ning cu Pastor, Nuhmei, Inn hlang le Pension tiin an then i Pastor minung 84 nih inn hmun 21 caah mee an zuh. Nuhmei 240 nih innhmun 58, inn hlang 391 nih innhmun 96 le Pension 95 nih innhmun 25 mee an zuh cio. An dih lak minung 810 hi mee a zuk kho ding in cohlan mi an si i hi vialte nih innhmun 200 caah mee an zuh hi a si. +++

About The Author

Na ruahning rak langhter ve.. (Leave a comment)

%d bloggers like this: