Hakha-Thantlang Lai Cachim Saya/ma Rianpek Mi An Tlawmtuk Caah CACC Nih Cozah Sinah Chimphuan Than An Timh

Salai Elvis & Salai Cungcung|2019 September 12| Hakha peng le Thlantlang peng chung cozah sianginn ah Laica chimhtu rian a hmu mi hna cu minung 103 tluk lawng an si caah tamdeuh ruahpiak than dingin cozah sin chimphuan than kan timh tiah CACC Art & Culture Department tuanvo ngeitu nih  a chim.

Sianginn pakhat ah  siangngakchia minung 10 in 100 kar lak ah Lai cachim saya/ma pakhat an chiah mi Policy kong ah Lai tlang sining in, cu policy he aa kalh tuk caah a tubantuk in cozah riantuan sin ah chimphuan than an timh hi a si.

“Kan mah ca holh le nunphung bu nih cozah sin ca  tial than ding in timh tuahnak kan ngei, zeiruang dah ti hin nan kan tuah, kan nih Laitlang lei ah cun sianginn pakhat ah taangcheu, taangkhat, taanghnih , taangthum tiang minung 40 tling a har caah saya/ma hmuh ding a har, cucaah mah hi rak kan ruah piak than uh ti in ca kan tial than lai” CACC in Caholh lei tuanvo ngeitu Pastor Lai Cung nih The Chinland Post ah a chim.

“Laica cawn dingmi taangthum tiang minung 40 an tlin lawng ah saya/ma pakhat kan pek hna lai tiin an policy kha an rak thlen rua, cucu kan rak theih ti lo, cu ruang ah sianginn tampi nih Laica chim tu saya/ma an hmuh lonak hi a si.” tiah a chimchap.

Hakha peng Cozah sianginn ah Laica chimh ding in minung 260 hrawng nih an sok i minung 56 lawng nih an hmuh. CACC nih aa ruah ningah Hakha pengah minung 115 nih an hmuh awk a si i Thantlang peng ah minung 80 tel nih an hmuh awk a si tiah an rak i ruah chan. A sinain an rak ruah lo leng pi in rian hmu mi an tlawm tiah kan theih.++++

 

Na ruahning rak langhter ve.. (Leave a comment)

%d bloggers like this: