Hakha Thar Mino Nih COVID-19 Runvennak Kalay Lam Gate Hngah An Ngol

0

Motor Luh Lio/ Sipin EO

Salai Ngun San Aung| 2020 May 9|Covid-19 zawtnak in runvennak caah Hakha Thar in Kalay lei a lutmi lam a hngaktu Hakha Thar mino cu May 8 zan in gate hngah an ngol tiah kan theih.

Hi kong ah, “May 8 zanlei 6:15, inn I rawl ka chuan lioah gate hngakmi kan naupa nih a rak ka chawnh i Sipin bawi pakhat a ra I motor vialte a luhter dih hna tiah a ka chimh. A rannak in ka va kal nain ka khel ti hna lo an rak lan dih cang. Sipin bawi cu U Tam Aung Shing (Sipin Executive Officer) a si. Motor khua chung kan luhter ahcun motor mong le a zultu (Spare) pawl hi khua chungah an lut lai lo tiah kan chim kho lo. A lutmi zong an um tiah kan theih. Cozah nih thil paoh Kankaw lam gate ah thlak dih ding tiah nawl cu an chuah ko a sinain Kalay in a tlungmi motor nih Kankaw lam gate an phaknak dingah khuachung pal loin zeitindah an kal lai? Khuachung an kal pah ah kunya le ti le rawl tibantuk herhhai hna cawk sual hna sehlaw tah tiah kan naule nih Sipin EO pa cu an rak ti tikah khuachung kong cu nan lungrethei hlah uh ka mninung an tampi ko keimah nih tuanvo ka lak lai tiah a leh hna. Cucaah amah nih tuanvo a lak khawh ko ahcun zeidah kanmah nih mitkuh fe in gate hngah len cu a hau tiah kan ngol nak a si ko” tiah Hakha Thar mino hruaitu Pu Hniang Bik Hu nih The Chinland Post ah a chim.

Hakha Thar mino nih pumpek (volunteer) in Kalay lam gate hi ni 12 le zan 12 chung gate hi an hngah cangmi a si.

U Tam Aung Shing cu TCP nih kan pehtlaih tikah, “Cozah nih nawl a chuah ningah thilri paoh cu Kankaw lam ah tthumh dih ding timi a si. Hakha Thar lamton ah thil an thumh tikah thil ngei nih motor he kethum ngei cycle (Tungbing) he an rak thiar tikah puai tuahmi ko an lo, mi an ibu tuk cucu anmah sang ca zongah a himbawm lomi a si. Kankaw lam gate ah thilri an thlak dih lai cun anmah dang tein umnak ding zongah cozah nih hmunhma kan timhtuah piak hna. Motor mongtu le a zultu lawng an si lai. Khualtlawng motor paoh cu hohmanh luhter lo ding tiah ka ti ko hna. Mino nih thazaang chuah in hi bantuk runvennak rian an tuanmi hi ka upat tuk, kaa lawm tuk fawn” tiah a chim.

Hakha Covid-19 Response Committee (HC-19RC) chungtuan Dr. Biak Cung Lian nih, “April 22 meeting biachahnak ah thil phor motor paoh Kankaw lam gate ah kalter dih ding, cuka ah thil thlak i rikhiah piakmi hmun ah umter dih i motor mong le a zultu pawl khuachung ter bak lo ding timi a si. Mah ah a poimi cu Kankaw lei in a lutmi caah cun Khuachung pal a hau lo. Nain Kalay lei a lutmi caah cun khuachung pal a hau. Cucu biakhiahnak tuahmi zawn ah aa laklawh mi a si. Sipin EO nih tu bantuk a tawlrel lio ah khan mino pawl he iceiruahnak rak um deuh sehlaw gate hngah ngol tibantuk tiang hi cu a chuak men hnga lo tiah ka ruah. Kan tonmi hi thawngpang ithanhnak le ipehtlaihnak ah chambau deuhnak tete a um lengmang ruangah a si ko tiah ka ruah. Kanmah HC-19RC le Hakha Thar mino zong cu tonnak hna kan ngei lai I riantuanti ding zong kan iceih lai I gate hngah zong cu a herhning in kan tawlrel than ko lai” tiah TCP ah a chim.

Pu Hniang Bik Hu nih, “Sipin EO pa hi a rat lioah kan naule nih gate in an kham i a dir lo. Cucu minung zei i a kan rello hmanh ah kan riantuannak tal cu a upat i gate kha a upat ding a si tiah kan ruah. Cun motor mong kha ho an si timi an konglam zong lakter a kan duh lo. Tuhlan ah thilphor motor paoh hi kanmah sang lamton ka ah khin thil kan thlakter hna. Ni 12 le zan 12 cuticun kan tlangtlak cang i zeihmanh buaibainak zong a um bal lo. Mah cu ti kan sang I thil an thlak ka ahcun kan sia a rem lo ngai. Asinain motor mong le a zultu hi khua chungah an lut lengmang ti kan theih caah Hakha pi himnak dingah cun kanmah sang tu nih a herhning in tawlrel ko usi tiah sangmi he riantuantu he kan ruah caah tu bantuk in kan tuahmi a si” tiah a bia peh ah a chim.

“Gate ah an ka kham mi tu cu phehthuh lo tein ka hmu lo. Cun motor mong pawl an konglam lak a kan sianhlo timi tu cu ka hngal bak lo. La hlah uh tiah ka kham hna lo. 6:09 ah ka phan i 6:59 ah ka kir. Cu chung vialte ah an lak duh cun lak khawh a si ko. Hakha thar sang ah thil an thlak tikah lam an phih dih cun, Hakha Thar mizapi ca zongah a him lo caah ti bantuk in cozah nawl chuahning tein ka tlangtlak mi hna a si. Kankaw lam gate I kal ka fialmi hna hi kei 12 ngei motor pathum an si. Keimah nih gate an phak tiang an hnulei tein ka zult hna” tiah Sipin EO U Tam Aung Shing nih a chimchap.

Hakha Thar gate hngahnak ahhin kan hnulei ah khan Lailenpi in a rak tlungmi pakhat Chief Minister nawl peknak in an luhter I Hakha Thar mino pawl cu lungthin nuam lo ngai in an rak um cang tiah theih a si. Gate hngah rian a thar in tuan than le tuan than lo cu cozah zung lutlai le sang mino ipehtlaihnak ngei in biaruah le hnatlakti nak ngeih lawngah thil a fiang te lai tiah kan theih.

About The Author

Na ruahning rak langhter ve.. (Leave a comment)

%d bloggers like this: