Hakha Tho Hlasaknak Cu Fiakfairock Band Nih An Tawlrel Lai
Salai CungCung|2018 October 20| Tukum Hakha Tho ah hlasatu ding cu Fiakfairock band chung hlasatu le nu Tawk Men an si tiah kan theih.
“Tukum Tho ah hin kanmah Fiakfairock band nih hla le music lei tuanvo kan laak. Hlasatu ding hi kanmah Fiakfairock band chung hlasa pin ah Tawk Men hi kan sawm chih. Kan band chung hlasatu hna cu Van Siang Mang, Calinton, Thawng Van Mang, Biak Thawng, Ruth, Lung Tum Kheng an si i a dang pawl kan Hakha hlasa thiam pawl tu lio khualtlawng mi an um pah dih hna” tiah Fiakfairock band Chairman A Lian nih The Chinland Post ah a chim.
“Lai nunphung laam hmuhsaknak hi phu tampi kan chimh hna i phu zeizat dah aa tim kho te lai ti cu kan hngal rih lo. Kan sawm mi hna cu Zion, IBC, HBC, Zotung, Senthang, Matupi lei, Cimnuai, Zophei, Hakhathar Baptist Mino, Mara, University hi an si. Cun decoration lei zong hi a tha bik le aa dawh bik in kan i zuam. Hi pawl decoration lei media lei hi cu Fiakfairock band lei si ti lo in media lei le decoration, entertainment lei hi mi an kan thim i cu committee chungtel mi pawl nih ceihkhannak kan tuah hi a si. Hi Tho cu Live zong in kan thlah lai, ramchung ramleng um Laimi vialte nih zoh kho hna seh tiin kan tuah lai” tiah a chimchap.
Hi Tho cu October 25 chun suimilam 12 in zaanlei suimilam 6 tiang, Carson hall ah an tuah lai tiah kan theih.
