Hakha Tipil Khrihfabu Cheukhat Senior Pastor Thlahlawh An Kai
IBC biakinn/Photo: TCP
Salai Cung Cung |2019 January 30| 2019 Church council meeting an tuah hnu Hakha Tipil Khrihfabu (Baptist Church) cheukhat Senior Pastor thlahlawh a kai, a sang bik ks. 500,000 tiang a phan tiah kan theih.
Hakha Tipil khrihfabu tampi lakah Zion Baptist Church (ZBC), Immanuel Baptist Church (IBC) le Hakha Baptist Church (HBC) hi bu ngan bik pawl an si. Hi Khrihfabu pathum lakah senior pastor thlahlawh a sang bik cu IBC a si.
IBC khrihfabu in Senior Pastor thlahlawh hi nikum ah ks. 445,000 a si i tukum cu ks. 60,000 an chappiak caah a thlahlawh hi ks. 505,000 a si cang lai. Staff vialte hi tukum ah ks. 40,000 an chappiak cio ve hna.
Zion khrihfabu in senior Pastor thlahlawh hi nikum ah ks. 450,000 a si i tukum cu ks. 50,000 an chappiak caah a thlahlawh hi ks. 500,000 a si cang lai.
HBC khrihfabu in senior Pastor thlahlawh hi nikum ah ks. 420,000 a si i tukum ah ks. 30,000 an chappiak caah a thlahlawh hi ks. 450,000 a si cang lai.
IBC khrihfabu in Senior Pastor Rev. Lal Pek Lian nih, “Hi bantuk thlahlawh a kainak a ruang bik cu Khrihfabu member nih a kan dawt tuk ruang ah a si. Kannih khrihfabu cu church member nih a kumfa te in thlahlawh an kan chappiak lengmang ko” tiah The Chinland Post ah a chim.
“Tukum hi nikum nakin tlawmpal te thlahlawh a kai deuh. Kannih cu kumkhat voikhat in thlahlawh kan kai lo, kan hmuhmi tangka zohchunh in kan i pe” tiah HBC khrihfabu in Senior Pastor Rev. Dr. Steven Lian Hup Ling nih The Chinland Post ah a chim.
