Hakha Um Sianghleirun Siangngakchia Bu Lentecelhnak In I Hawikomhnak An Ngei
Salai Cung Cung |2018 November 14| Hakha um Sianghleirun Siangngakchia Bu_ HUSO (Hakha University Students Organization) nih anmah Sianghleirun siangngakchia ihawikomhnak ding caah November 15 in 16 tiang nihnih chung Hakha GTI (Government Technical Institute College) ah lentecelhnak an ngei cuahmah lio tiah kan theih.
“Hi lentecelhnak an tuahnak a ruang cu kanmah sianghlerun hi Hakha ah tampi kan um i pakhat le pakhat kan i hngalh dih hna lo caah pakhat le khat i theihhngalhnak le hmailei hmunkhat te rian tuanti khawhnak ding hmuitinh he a si. Hi lentecelhnak ah hin pumpululh chuih, Volleyball bengh, hri hnuh le adang dang lentecelhnak a phunphun kan tuah chih lai” tiah HUSO President Salai Biak Lian Thang nih The Chinland Post ah a chim.
Hi HUSO Cup caah phu aa thenning cu,
1. Vaurawng (Gangaw Lam + Pyidawtha + Khuahlun)
2. Chokhlei (Leisen + Cawbuk)
3. Senri (Dawr Thar)
4. Dingdi (Khua Thar + Hakhathar)
5. Bingbir (Chin Oo Sii + Keih Sih + Dinlo + Kethei Bo + Dawrhlun)
6. Phaizawng (Senior Friends) an si.
HUSO cu hlan ah cun HUSF (Hakha University Students Fellowship) ti a rak si i 2016 in HUSO tiah an thlen. HUSO ah hin chungtel 500 an um i chungtel luh man hi ks. 2000 a si tiah kan theih.
“Kanmah HUSO nih tukum chung kan riantuanmi pawl cu kum hramthawk ah hin Education awareness camp kan tuah. Tang 5 in tang 8 tiang Singinn ah an cawn deuh lomi pawl Laica, Lai phungtluk tibantuk tete kha zarhkhat chung cawnpiaknak kan ngeih hna i minung 100 hrawng an kai kho. Cun Thingkung cinnak kan ngei, Tanghra awng kami pawl kha Major lakning le major konglam kan chim hna. Khuachung ah hmunthur kan char, Lairam thanchonak ding tiah seminar kan tuah. Aralaimi ah cun mino le pawngkam zohkhennak Seminar ngeih than kan i tim” tiah a chim chap.
HUSO nih November 15 in 16 tiang hawikomhnak lentecelhnak tuah liomi ah hin pakhatnak laksawng le pahnih laksawng um lai. Cu laksawng pawl cu trophy an si lai. Hi tuahnak ding caah hin tangka 250,000 hrawng an dih lai tiah kan theih. +++
