Hakha University Chapel Biakinn Saknak Caah Bawmh An Hal Cuahmah

Hakha University Chapel Design/HUSU

Salai Josephbawi| 2020 September 16| Hakha University ah Pathian thangthatnak caah Chapel (Pumhnak Biakinn) sakding tiin Hakha University siangngakchia Bu nih Hakha, Thantlang le Falam ah tangka bawmhnak an hal cuahmah tiah thawng kan theih.

Hakha University i Biakinn sak ding cu University Christian Fellowship (UCF) riantuan University Saya/mah te nih pe 106, pe 60 Ks.1600 dih dingin sakding le timtuah biachahnak ngeih a si i budget an kawl cuahmah lio a si.  Kyats Sing 1600 a dihdingmi ah Hakha Baptist Association nih sing 250, Kawlram Cozah ralkap lutlai General Min Aung Hlaing nih Cement (bilatme) tun 1000 le Camphio tlap 250, Hakha mirum le bawmchantu hna sin azapi sing 400 an hmuh cang tiah theih a si.

Cu tangka kawlnak ding caah Hakha University Students Union nih Hakha, Thantlang le Falam ah bawmh an hal cuahmah hi a si.

Hakha University Students Union Bawmhhal Lio Sept.15/HUSU

Hi kong he pehtlai in rianngeitu chungtel Literature and Culture Committee leader Tha Hre Kam nih “Hakha University ahhin kanmah Hakha Thantlang Falam lei lawng silo in Chin ram kakip in siangngakchia 1000 leng kan um cang. Hakha University Boarder ah Siangngakchia chungah 80% fai Khrihfa kan um nain umnak le khuachung biakinn aa hlat caah pumh a duh ko nain aa pum kho lo sianghleirun tampi kan um. Hi Chapel kan lim ahcun Sianghleirun mino pawl pumsa thlarau in nun thanchonak tampi kan ruah caah Hakha University sayamah te lamhruainak thawngin fund kan kawl cuahmah hi a si. Kan nu kan pa, kan unau nih nan chawva in kan dirhkamh cio hram u. Hakha khuachung ah kanmah University minung 50 fai phu linga in kan ithen I Sept. 6-15 kar Bawmh kan hal I sing 110 kan hmuh. Thaizing Falam lei peh kan itim, cu dih in Thantlang zong kan kal rih lai” tiah The Chinland Post ah a chim.

“Kan muitinh ningin ramchungah Tangka kan hmuh lo ahcun ramdang um Chin mi hna sin zongah bawmhhal kan itim.” Tiah a biapeh ah a chim.

Hakha University cu Hakha College dirhmun 2016 kum in cacawnnak rak thok a si i Degree College pek ti lo in Cozah nawl chuah 474/2020 August 31, 2020 ni ah Hakha University tiah phungning tein min pek a si. Hakha University ah Sianghleirun 1000 fai an um tiah theih a si.

 

 

Na ruahning rak langhter ve.. (Leave a comment)

%d bloggers like this: