Hakha Vawlei Hmun Kong Ah Pu Biak Peng Hraam Thawng
Salai Elvis| 2019 January 27| Chin ramkulh cozah nih tawlrelmi Hakha khuachung sersiamnak le inn hmun cawhmi kongah Pu Biak Peng nih a lungfahnak a chimmi hraam thawng cu a tanglei bantuk in a si.
Pu Biak Peng: Atu a kan uktu hna hi Lai lawng te an si. Kan khua an kan kilhkamh lai tiah mee kan rak pek hna. Cu hna cu kan khuaram a hrawktu ah an cang i kan lung a fak ngai. Cu hna nih cun Hakha khua chungah Pupa vawlei a um lo, an cinthlak mi zong a um lo an ti mi kong ah chim ka duh mi cu ‘Pupa vawlei ti a si i Pupa fungvai ti a um lo. Pupa facang ti a um lo i Pupa thingkung ti a um lo’ cucaah pupa vawlei tiah an auh i cu chungah a ummi cu Lung le thingkung an si, cu a ngeitu cu Pupa an si i ngeitu an si.
“Pu Sui Thio nih a chimmi chungah a theih lo ahcun fianter ka duh. A khua ah khin vungkal in keimah nawl in lovat ning law Pu Sui Thio nih zeitin a kan ti hnga? ti kha hngal seh law a lung rak fim seh.
“Pu Zo Bawi nih a chimmi cu Hakha i ummi thanchonak a duh lomi cu Hakha in chuak u’ a ti tikah kan thimmi kan mee man te a si mi khi aa philh rua. Pu Zo Bawi khi a tubantuk in Vuanci a rak tuan lo i keimah zong hi a tuan lai ah a rak ka leng i kan inn voithum a phan. Ni hin ni ah cun ka mui hmanh a ka hmu thiam ti lo, mah cu nih cun Hakha in chuak u, kal u a ti’ tikah hin a hmasa bik in Hakha khuachung in a chuak i a kal ding mi cu a mah Pu Zo Bawi kha a si. Hakha khua kan ser an ti an cungah lawmhnak tam pi kan ngei.
Khua ser an i thoknak cu mi vawlei chuh, mi hau bauh, inn a sa mi theh ter le tazacuai khan an thok. Khua kan ser lai inn karh seh, minung karh seh an ti si cun har le fe te inn a sami tazacuai tawn mi hna kha ni hin ni in cuai ti lo in a nawltu kan nawl hna seh ti ka duh. Khua thanchoter kan duh an ti inn sa mi an thloh tung hna i hmundang Mizoram, ramdang hna in an ra lai i mah hna caah an kan ti pumpak vawlei le pupa vawlei ngei mi hna kha a thil thup in an kan chuh riangmang i sing 20, 30 ah an zuar i khua kan sernak lai ti an tuak. Lothlo mi kan pawcawmnak i hmanmi cu kan vawlei a si. Kan vawlei an kan chuh i an zuar tikah zeitindah kan i cawm ti lai.
Cucaah Pu Zo Bawi le Pu Sui Thio an lung i fim hna seh law, lothlo hna hi upat hna u si, nawl hna u si. Hi tin kan um lengmang ah cun kan mah tu thawl kan si sual lai ti kha i theih hna seh law, khua chung ah tuan awk rian a tampi, khi tu khi kan tuan piak hna seh. Inn hmun kan samh an ti i tiva kan cek, mi dum lo le thing kung zong an phuk in an hrawh dih. Ram kan ser lai an ti mi hi ram that an duh ah cun lothlo le mizapi kan chihruah hna seh law lungkhat tein kan tangrual ti lai. Atu bantuk in rian an tuan ah cun Hakha khua chungah rian an tuan kho lai lo. Cucaah an lungfim hna seh law zah zong hngal pah hna seh law i ralring cang hna seh.
Acunglei langhter mi hna cu January 25 ni duhlonak lam zawh dih hnu ah vawlei hmun chuh a tongmi hna nih Media sinah chimphuannak an tuahmi a si. (The Chinland Post fb live thlahmi ah zoh le ngaih than khawh an si)
About The Author
