Hakha Vawlei Hmun Kong Ah Pu Mang Nawl Le Pu Siang Hmung Hraam Thawng
Salai Elvis| 2019 January 27| Chin ramkulh cozah nih tawlrelmi Hakha khuachung sersiamnak le inn hmun cawhmi kongah Pu Mang Nawl le Pu Siang Hmung nih an lungfahnak an chimmi hraam thawng cu a tanglei bantuk in a si.
Hakha khua cu cozah nih Chinram khualipi a pek hnu in Chin Oo Sii ah cozah umnak inn an sak duh caah 1964 lio hrawng ah cozah nih pupa hna sin ah cozah inn sak kan duh tiah an rak hal hna caah an rak pek ko hna. Chin Oo Sii hrawng ah a rak ummi pupa hna cu cozah nawl le duhning in an inn an rak thial ko hna.1976 lio zong ah pupa hna sin ah cozah nih golf tual ser kan duh an ti caah pupa hna sin ah an rak hal i an rak pek ko hna. Atulio a cozah nih pupa ram vawlei ah hmunhma an duh ning paoh in vawlei lak an duh. Ramngeitu rak kan chim hna seh law Hakha thanchonak ding ah vawlei kan sian tuk ko. Ram ngei cu minung 100 hrawnglawng an si i Hakha mipi inn ngei lo cu minung 5000 an si. Cozah an kan dirkamh ko lai ti NLD cozah nih an ruah caah ram ngei pawl duh paoh in an kan tuahnak hi a si tiah January 25 chun Hakha lothlo phu in lamzawhtu hna nih an chim.
Pu Mang Nawl: Ekah 600 chungah leikuang, Ngakhur ngeimi ka si. Mah vawlei khi ka pa nih pupa ram sinah a rak hal mi a si. Mah hlan zongah a tu cinthlaknak dum tha pi zong khi an chuh, an chuh hnu ah Na-la-ka nih Congpaseh ah an pek. Leikuang ekah 11, nga kaan ekah 1.45 kan ngeihmi cu chimhruahnak um lo in Pu Ral Kham nih Set-kyi in a cawhter dih hna i leikuang le Ngakhuar vialte a rawk dih. Inn hmun zong na (cuu-caw) Lei kuang le Ngan kaan zong a um lo a ti. Vawlei an chilh dih cang ah cun zei cu dah a um ti reng hnga. Na cuu-caw a ka ti mi ah a mah nih maw a cuu-caw, kei mah nih dah ka cuu-caw.
Kanmah vawlei a si caah inn zong kan sak khawh pin ah cinthlak mi zong a phunphun kan cin. Ka vawlei kongah tet-te felfai te ka kut cungah a um dih. Mee-sa-zin zung le Kung-myint-lay-za nih tuahpiak mi minthut zong ka ngei. Ka pa nih a rak cinmi dum chungah Rua kung, Banhla, Memu kung zong kan cin. Hakha mirum Chum Ling zong nih a tu le tu a hrawh. Mifir (damiah-taih) bantuk in an kan tuah. Hi kong ah a rannak in rak kan tawlrelpiak hna seh ti chim ka duh.
Pu Siang Hmung: Laimi nih Kawl vawlei kan chut bal hna lo. Kawl cozah tu nih an kan chuh khi a si. Kanmah vawlei inn te ah a ummi kan si ko. Kan vawlei chuh in lam an sermi cung zong ah inn sak awk a tha hrim lo. Cozah nih kan vawlei cung ah zuarnak nawl an ngei hrim lo. An nu vawlei a silo, an pa vawlei a silo. Pupa ram ah an duh ningin an tuahkho lo.
Acunglei langhter mi hna cu January 25 ni duhlonak lam zawh dih hnu ah vawlei hmun chuh a tongmi hna nih Media sinah chimphuannak an tuahmi a si. (The Chinland Post fb live thlahmi ah zoh le ngaih than khawh an si)
About The Author
