Hakha Vawlei Hmunhma Kong Ah Tlaihmi September 23 Ah Biaceih Zung An Chuahpi Hna Lai

The Chinland Post| Hakha| 2019 September 20| Cozah nih Hakha khuapi kauhnak caah tiin ekah 676 a samhmi ah ningcang lo le phungning lo in hmun an zuar tiin an tlaihmi minung paruk hna cu aralaimi September 23 ah biaceihnak zung an chuahpi cang hna lai tiah Hakha peng palek zung in thawng kan theih.

Phungning lo in hmun an zuar tiah Pu Zung Mang, Pu Bawi Awr, Pu Chan Tling, Rev. Dr. Hrang Kil, Pu Hmet Er le Pi Ngun Par cu Hakha pengkulh uktu cang U Tint Wai nih mipi chaw le thilri ningcang lo hmannak pomah (6) hmang in taza a cuai hna caah September 8 ah an tlaih hna.

Hi tlaihmi hna cu atu tiang Hakha thonginn ah an hren rih hna i nihin tiang an chuah rih hna lo tiah kan theih.

“Tazacuai an sinak pohmah hi amah-khan piak a ngah lo. Cucaah nihin tiang thonginn ah kan hren rih hna nak hi a si. September 23 ah an biaceihpiak a si lai i biaceihzung nih aa-mah khan in chuahding bia an chah ahcun chuah an si ko lai. Biaceih zung nih chuahnak nawl an pek hna hlan chung cu thonginn ah kan hren rih ko hna lai,” tiah Hakha palek zung lutlai nih The Chinland Post ah a chim.

The Chinland Post nih thong thlakmi paruk hna cu biaruahding in palek bawi nawl kan hal ko nain, Media nih ton cu kan onh lo, chungkhar le hawi le komh lawng tonnawk nawl kan pek hna ati caah bia kan ruah kho hna lo.

Chin ramkulh cozah nih a samhmi ekah 676 ah phungning lo in inn a sa tiah a timi inn 100 renglo cu August 20 ah an hrawhpiak hna tiah kan theih.