Hakha View Point Tower Sakmi May Thla Chung Ah An Lim Cang Lai

0

Salai Cung| 2018 April 19 | Hakha Gangaw lam, Khuacuanh tlangbo (View Point) ah nihlawh alakte in Power Seven company nih a sak cuahmah liomi Tower cu May thla chung ah an lim dih cang lai tiah kan theih.

Hakha khuacuanh tlangbo innsangpi (tower) cu ks. sing 700 dih ding in Power Seven Company nih a sak cuahmah lio a si. Sak man nihlawh hi power seven company nih fangkhat hmanh a la hna lo, alak (free) te bak in a sak. Cun, hi innsang saknak budget hi cozah tangka fangkhat hmanh aa tel lo, Hakha khuachung bochanmi upa hna bawmhhalnak in sakmi a si tiah kan theih.

 

“Hakha view point tower cu bawmhnak hal chom in kan sakmi a si. Cozah lei bawmhnak tel lo, private in Hakha khuachung um bochan deuhmi pawl kha bawmhnak kan hal hna i cozah riantuanmi zong nih pumpak in a kan bawmmi an um ve. Cun Myanmar ram Vice-President Pu Henry Van Thio zong nih nai Hakha a rak tlun ahkhan sing 50 a kan bawmh. Tu lio kan tangka ngeihmi zapi hi sing 558 a si i power seven company nih sak man lak lo, alak te in a kan sakpiak lio a si” tiah Chin ramkulh Sipin lutlai Director Pu Thla Hre nih The Chinland Post ah a chim.

Hi Hakha view point tower cu a san pe 36, a kauh pe 18, cun a cungbik view zohnak hi pe 32 kau in an sak. Hi view point tower cu Vice-President Henry Van Thio nih sing 50 hram a bunhmi in le a dangdang bawmhnak in sak a si tiah kan theih.

“Hi Hakha view point tower hunnak cu Vice President Henry Van Thio sawm in hunnak kan tuah te lai. Cun a kan bawmtu an min vialte zong philhlonak rolungca kan tialpiak dih hna lai. Zeicahtiah cun hi tower sakmi le rolungca tialmi a hmutu paoh nih Hakha khuachung khualeng ummi Lai miphun zeitluk in dah kan lung aa rual i kan i funtom, zeidah kan tuanti khawh timi kan hngal hna seh ti langhter kan duh caah a si” tiah a biapeh ah a chimchih.

Pumpak in a hlutu hi minung 50 hrawng an si cang. CB bank zong nih ks. sing 200 an hlut tiah kan theih. +++

About The Author

Na ruahning rak langhter ve.. (Leave a comment)

%d bloggers like this: