Hakha Viewpoint Luh Man Tlawmpal Lak A Si Cang Lai

Hakha TCP |2019 October 1| — Hakha Viewpoint le Myanmar Vice-president Pu Henry Van Thio Tower a lut mi le a kal mi hna nih ningcang lo le thurhnawn tuk in an hman tawn caah View Point a kal mi paoh luh man tlawmpal lak an si cang lai tiah thawng kan theih.

“Hakha Viewpoint le Myanmar Vice-president Pu Henry Van Thio Tower a lut mi hna nih ningcang loin le thurhnawn tuk in an lut, Zuu an ding, pakhat le pakhat an i sik, cun remhnak ding le chap nakding ah caah tangka zong a um lo. Cucaah Sipin nih License in an zuar. Cu License a hmutu nih a tlaih lai i luh man hi an mah chim ning ah cun tangka 1000 siseh an ti nain tam tuk lai ka ti caah 500 Ks hrawng in siseh tibantuk in ruahnak ka pek hna. Kan Laimi nih pangpar dum hna kan va luh tik ah man pek a hauhnak kong zong theih ve usih ti duhnak khi a si. Luh man a um cang lai tik ah a hngaktu zong an um lai. Cun ningcang tein a luh a si lai caah zeihmanh hnahnawhnak zong a um ti lai lo” tiah Chin ramkulh Sipin Director hlun Pu Thla Hre nih The Chinland Post ah a chim.

“Hi luh man cu October 1 in a sinain tha tein le biatak tein van tawlrel tik cu thlakhat hnu hrawng a si te men lai. February thla ah Japan pawl an rak tlung lai i Japan Cherry kan cin lai. Myanmar Vice-president Pu Henry Van Thio zong nih a chimh cang hna. Cun thingkung cin mi pawl zong kan chap lai, Mei rawk mi zong kan remh lai. A dang dang tete zong remh ding um mi pawl zong kan remh lai tiah timh tuahnak kan ngei. Luh caan hi zing suimilam 6 in zaan suimilam 9 tiang a si” tiah a chim chap.