Hakha Zophei Sianghleirun Siangngakchia Bu Nih CNF/A Caah Phaisa Kyats Sing(55) Bawmhnak Pek

Salai David Van + Salai Josephbawi |TCP-Hakha| 2021 January 25| Hakha Zophei Sianghleirun Siangngakchia Bu (HZSSB) hohatnak in Zophei Sianghleirun a kailiomi hna nih Chin National Front/Army (CNF/A) caah Zophei khuatlang bawmhhal ah an tlawng i Tangka Kyats 5,500,000mmk bawmhnak a pek hna tiah theih a si.

“Miphun le ram caah nunnak pek in rian a kan tuanpiakmi Chin National Front/Army caah bawmhhal dingin Meeting voi(2) kan thu, Paletwa ralzam ca zongah bawmhhal kan rak itim hmasa nain COVID-19 kong nih a kan hnorsuan deuh caah CNF/A ca lawngah Zophei khuatlang khuakip kal in bawmh ihal seh kan ti i minung (38) phu hnih in kan ithen i January 4-12, 2021 tiang kanmah HZSSB ngeihmi budget in kan tlawng. Kan khualtlawnnak zongah kanmah ca silo in miphun ca rian a tuanmi hna ca hal a si tikah Zophei khuakip nih thazang a kan pek ngaingai. Chun ah bawmhhalnak le Zan ah inntek khuami he biaruahnak, khua konglam cazin laknak kan ngei. Khua konglam lakmi zong Zophei Youth Organization (ZPYO) he ceihhmainak le riantuantinak kong kan ceih te lai. Zophei khuakip nupa sin kan tlawn tikah eidin, ihzaunak tlamtling tein nan kan sersiampiak lengah miphun ca rian a tuantu hna tangka chawva a petu nan dihlak cungah kan I lawmtuk” tiah HZSSB President Salai Bawi Uk Lian nih The Chinland Post ah a chim.

“ Zophei khuakip pekmi sing (55) zong CNF/A pekchanh ding le biaruah dingin January 22-25 kar kan tlawng. Cawnpiaknak nikhat le zan ah biahalnak le ihawikomhnak in caan kan hmang hna. CNF/A camp kan phak tikah an sining an harnak kan va hmuh hna. CNF/A caah tangka chawva in kan bawmh khawh hna lo zongah kan thinlung, kan ruahnak dihlak in kan dirpi kan tanpi hna a herh” tiah a chim chap.

Hikong he pehtlai in HZSSB Vice president Salai Van Hmun Lian nih “ Hibantuk in CNF/CNA caah bawmhnak kan peknak hna ah hin kanmah te cun kan ngeihmi a um lo caah Zophei pumpi phuhnih ah i then in zarhkhat chung bawmh kan halpiak hna. Bawmh kan halmi hna chungin kan hmuhmi dihlak hi 5,500,000MMK a si i CNF Camp tlawn pah in kan va pekchanh cang hna. Zeiruangdah hibantuk in bawmhnak kan halpiak hna ti ahcun Zophei Sianghleirun Sianghngakchia Bu in Victoria Camp kan kal tawn ah khin an harsatnak kan theih mi a um tawn. Cucacun ni khat hnih an eidin cawk nak ca tel ah tiah Zophei laihlum khuakip nupa sin ah kal in bawmhnak kan halpiaknak hna a si. Cun hi bantuk in zarhkhat chung Zophei khuakip ah bawmh kan halnak ah hin zeihmanh harsatnak kan tonmi a um lo” tiah TCP ah a chim.

Zophei khuatlawng cu Thantlang peng nitlak thlanglei ah a ummi a si. Zophei khuatlang ah Kuhchah, Congthia, Phaikhua, Hmawngtlang, Leitak (A), Leitak (B), Leitak Zipi, Aibur, Khuabung (A), Khuabung (B), Zephai (A), Zephai (B), Ngalang, Lawngtlang, Zaabung, Hlamphei, Vuangtu, Hriphi (A), Hriphi (B), Tluangram A, Tluangram(B) an um tiah kan theih.