2018-19 Cacawn Kum Hakha A.G.T.I In 108 Nih Diploma An Lak

0

A.G.T.I /IPRD

Hakha The Chinland Post| 2020 February 9| Associate of Government Technical Institute (A.G.T.I) 2018-2019 cacawn kum tiangah A.G.T.I kumthumnak tiang a dih cangmi siangngakchia pawl cu 2020 February 8 zing sml 8 ah A.G.T.I Diploma buaih peknak Hakha Carson Hall ah an tuah. Hi Buaih peknak ah Chin ramkulh Social Minister Pau Lun Min Thang, ramkulh zung rianngeitu hna, sawmmi upa hna, siangngakchia buaihlami hna, chungkhar le siangngakchia minung 1000 leng an kai tiah theih a si.

Hi buaihlaknak ah Civil Engineer (35), Electronic Engineer (27), Electrical Power Engineer (17) le Industrial Electrical(29) an zapi minung (108) cu Hakha A.G.T.I sianguk Dr. Salai Tluang Za Thang nih Diploma buaih a pek hna. Hakha ah Sehlei thiamnak lei University level kan ngeih rihlo caah Hakha ah kum (3) tiang lawng A.G.T.I in Diploma an la i Bachelor of Technology (B.Tech) le Bachelor of Engineers (B.E) cu Kalaymyo GTU (Government Technical University) ah va peh a si kan theih.

Hakha A.G.T.I cu 2008 December 15 ah on a rak si i 2008-2009 cacawn kum ah Siangngakchia minung (31) in rak thokmi a si i 2019-2020 cacawn kum ahcun A.G.T.I (1st to 3rd year) siangngakchia dihlak minung 586 sianginn an kai cuahmah tiah theih a si. A.G.T.I Diploma a dih cangmi minung 399 an si i cuchung ahcun B-Tech a dih cangmi 128 le B.E kai a ngahmi (133) an um tiah theih a si. Ref: IPRD| TCP Sources

 

About The Author

Na ruahning rak langhter ve.. (Leave a comment)

%d bloggers like this: