MASK lo in Lengchuah lo ding! Hakha ah COVID-19 Hrik Minung (5) Sin An Hmuh

TCP-Hakha| 2020 October 14| Hakha Siizung ah COVID-19 hrik a ngeimi minung (5) an um cang tiah Hakha Siizung (Hakha General Hospital) facebook page in October 13, 2020 zan 7:00pm ah kan theih.

“Yangon a tlun sin in Hakha Gate in Hakha Kutzung thiam sianginn ah Quarantine an chiahmi pakhat (nu) sin in October 10 ah an hmuh i Hakha Siizungah an chiah lio a si. Yangon Insein in a rak kir i Hakha Natala sianginn ah Quarantine chiah liomi minung pahnih (pa) hna sin zongah October 13 zing lei le zanlei ah Pakokku in motor driver le sapiar minung pahnih (pa veve) sinah an hmuh than. An zapi minung (5) an si” tiah a langhter.

COVID-19 Hakha an karhmi kongah lautuk ding asilo nain Lentecelhnak le Ngandamnak Zung nih COVID-19 he iralrin ding a timi cungah felfai tein nan zulh cionak lai le lunghrinhmi, Quarantine lut duhlo in aa thupmi hna nan theih ahcun Hakha penguk zung Ph. 07021086 ah thawngthanh khawh a si. Leng chuah tik paoh ah MASK ihruk cio dingin an forhfial.

October 13, 2020 zan 8:00PM tiangah Kawlram chung COVID-19 hrik a ngeimi minung 30,437, siizung a tum (adam) mi minung 11,769 le a thimi minung 693 an si tiah Cozah Lentecelhnak le Ngandamnak Zungpi nih a thanh.