Hakha Nawi Dam Kong _ Pu Ral Kham

Hakha Nawi Dam Kong| Pu Ral Kham| October 13, 2020

  1. Nawi Dam Kong

Nawi Dam tuah nak kong hi a ka hal mi nan um len nain Election lai a si caah ahnorsuan mi zong an um sual lai ka ti i ka chim lem lo. Asinain hmundang kaa dang um mi kan unau le hna nih khua nu/pa zong mawhchiat bantuk a si leng ah, Hakha hi a hlan le a tu a lo ti lo, asersiam ngai cang aa dawh mi le aa nuam mi khuapi si seh hmailei kan fa le caah rotha roh hna u sih ti kan duh caah tiin ni tiin awk kan tlawlen nak fing le tlang nelrawn hi rawk lai kaw kan ti lio ah a duh poh in a rawk thluahmah cang. Pathian kutneh Hakha khuapi rawk lo ding ah a tawi nak in kan vun langhter.

  1. Tii Caah Khuaruahhar Ding Um Lo

A tu Timit tii hi Likheng in Kham a si i gallons 36 million hi aa dil khawh caah hmailei tii kan har lai lo. Hakha khuachung caah tiikhonnak ti-iin ngan 12 a um. Galllons Ting (1) tlum pa (5), gallons 50,000 tlum pa (8), gallons 30,000 tlum (5) adih lak 950,000 hi chiah cia a si. Timit tii lak nak a tuah tu hi Kawlram ah Company min ngei ngaimi Myanmar A Hla Company an si. 2015 kum vawlei rawhcimh caan he an i tong nain a rawk lo Timit lei tiipeknak Pe (1) kua Pipe pahnih zong bunh piak a si nain atu tiang an hmang lo. Ti voi (3) lawng an Pump hnu ah Khuhsi lobo kam a phan i cu ka ah tii thianhnak (Sanitation Tank) gallons ting (4) tlum a um i cu hnu ah khuachung pek a si . Hi Pipe an tuah mi hi hmailei can saupi ca a tha sual lai lo ti in Aizawl tii la tu EE Thang Cung Nung le a hawi Engineer Pa(5) HRC (Hakha Rescue Committee)nih an kan sawm piak hna i zarhkhat chung an check hnu ah report cauk an chuah i cu ning in Myanmar AHla Company nih an remh dih mi a si. Micheu nih Nawi Dam tuah in Hakha tii lak nak an ti nain culio Chief Minister U Hung Ngai nih a peh zulh lo ti hna in nan tial nan chim, U Hung Ngai hi khua nu/pa he naihniam tein rian a tuan. Hakha tii lak nak ah Japan Company he voi (3) Kawl Company le Hakha Samyong Department he tha tein voi(3) an zoh dih hnu ah timit hi a tha cem ti i a fehter mi hna a si (CE Ngun Kio, Steven Tha Bik sin zong ah ca a um ko). Nawi cu a sawk tu nih an sawk an zoh ko an sawk an zoh ko. An fial hna caah design an suai nain a ho cozah hnatlakpinak a um bal lo. Kei mah ka tel zungzal, atu ah cun Nawi cu ti hmanh a um ti lo ti awk si.

Hi kong hi cu a kong tampi a um i tlamtling deuh in ka tial te lai. Kan hngalh awk cu Rung tlang pe 6700 ah gallons 50,000 le pe 6,500 ah gallons (30,000) tlum a um i Than Peng ngakan chak in a kai i a tu hi Timit tii kum (3) an ding cang. University le Hakha Thar zong an ding cang. A tu Town chung kan din khawh lo mi kong hi cu Tii chiahnak ti-inn (tank) ah ti a phan dih nain Cozah santlaih lo deuh a si tiin raltha tein ka chim. Khuachung tii a phan dih cang.

Ti man cu Unit 1:220 gallons ah Kyat 660/- lawng a a si caah Tanki 50 gallons tlum hi Kyat 300/-hmanh a si lo Tii man a fawi te. Ti um nak a dang tein ka tial chih. Tii kong hi a tuanbia tha tein ka ngei dih. A herh ning in ka chim te lai.

 

Water storage Tanks Storage of Distribution Water Tanks & Uses in Hakha Town

Tii um nak

 ‌a hmun

Inn zei zat In zei zat nih dah an hmuh Gallon Tii aum nak

Hmun hma

Gallon

Remark
1 247 21736 30,000 Mettamon
2 232 20416 50,000 SHS-2
3 444 39072 50,000 Satunglung
4 402 35356 50,000 Sipin
5 476 41888 100,000 Town Hall
6 600 52800 100,000 Dawrthar siangniamrun
7 346 30448 50,000 Cawbuk
8 47 5016 30,000 Thingramzung (tittaw)
9 80 70752 100,000 Noisuah+Viewpoint
10 91 8008 50,000 Phungkyikyaung
11 215 18920 50,000 Pyidawta Siangniamrun
12 285 25080 50,000 Khuahlun
13   Hakha thar -1 100,000 Cangsih Bo
14   Hakha thar -1 30,000 Vat Bo
15   Hakha thar -2 100,000 Nahau tlang
Dihlak     940,000  
  • Hakha i nikhat ca kan herh mi ting (4) gallons a si. A dang cu pawng kam a chuak cia a um.

 

  1. Nawi Cu Tlonlen Nak Ah A Si Lai

Hakha khuavel nak lam hi 2015 in chunh hramthok a si i 2019 December ah a dih. A lam cu Gangaw lam Car gate thlang in a zuang Cawbuk RC church a hel i Mohein dum le Par Hle Pa dum kar in a zuang I Chiabur ba tlang zulh in Nawi U Hniang Bik(Ceu Dun pa) U Ro Cung (Thang Hnin pa) zungzal an khua zak nak lo kar in Cerhpar Va, Van Khia lei(A hlan Tial Er lei) University Area a hel in Ro Cung lo ral in Nawiva ah hrawn thluah mah Kheltong va he an I ton nak University Area le Vanlawng Ground area ri in a kai I  ritkuang tlang ah Thantlang lam he a tong. Nawi Va hrawn vialte ahhin lei hmun, Dum, lo a rak um cia i tiva kam hi tlawnlen nak a tha hmailei ah pangpar dum le ngakchia lentecelh nak phun phun le Hotel an tuah te lai. Cun University Area he a ri caah tii lio nak tidil hi kheltong va chak le Chan Chum Hlei pa lei (Sayama Hniang Pangpar Dum) cun achak lei ah Thing thli thlang ah tilionak Pangpar Dum an tuah lai ii Hakha i Pathian sermi tlawnlen nak nuam ramdang van hai lo a si lai. Khua hel nak lam pe 18’ in Nawi thluan hi keivang zuan thiang a len lai i Timit tiang tlonlen nak tha ngai a si lai. University Chapel zong Nawi Va kam ah a tu an sak thluah mah lio a si. Kheltong va le Nawi an i ton nak chak deuh te tlangbo hrawn te ah Vanlawng Ground Security Police Station caah zuah mi a si fawn. Mah vial te khuahelnak lam 34’ ca in pe 18’ chunh mi Nawi hrawn a dawh zia hi kan Cabinet pawl nih an zulh dih University Compound Acre 560 zong an hngalh ko. Vice President sin catial tu bel te ka hmu bal hna lo.

  1. Nawi Cu Hmunhma Nih A Kulh Dih Cang

Hakha fa paoh cu Nawi hrawng hi nan tlonlen nak a si ko lai. Rili fate cu a si kho ngai hnga maw? Nelpa bel cu serkhawh ah cun a rem tak tak. Town Planning kan ceihkhan lio ah kan upa pakhat zong nih ramdang kan fa le nih Nawihrawn cu Inn hmun phonh lo ding ram dang bantuk in tlon len nak pangpar dum(Park) an rak kan serpiak uh ti bia a chimbal I kan hna a tla dih.

Nawi chak lei ah Inn hmun cangpaseh Tlaksih, Thurokua, Chitipi, Tuaihmong rawn, Chiabur va tiang inn hmun si, chak lei ah koh kuin, University, Vanlawng ground nitlak lei Ngauthu tlang(Zion Green Hill) ah, lung khuai nel tiang hualmi Tupi hualaui cum kalnak Thawng Meng nu lo chak tlang vialte tlanghrawn ah Viewpoint Hotel le Recreation Center, Cung Lei kam ah Canghmun, Tu lo , Mang Khawng, Tlengtler, Pildo nak lo, a um lai. Kei vang zuan in a kai lai I Nelpa dong lung khuai Bo tiang khan (3) chung tlangkai nak Ke in tlangkainak(Mountaineering) a si lai, Zion Baptist Church nih kum fate ting 10-15 dih in an kilven thingkung phun phun an cin fingtlang dawh ngai ngai mei ral an ven hring dil del in an um Pathian nih a kan serpiak.

  1. Pupa Ro Hrawh Khawh Si Lai Lo

            Nawi hrawn ah kan pupa in pawcawm nak khuasa, U Thawng Zam(Rev. Thawng Hmung pa) Ram Peng pa, U Cia Dun (Pa Ham pa), U Thang Hnin (Ro Cung pa), U Ram Peng(Sui khiang pa), Thang Hlun, Ro Cung nih an hngah rih kheltong  va chuah ah Lian Kung inn le lo he khua sa an si, Nawi Hrawn thlang lei ah Nah Luai, Pa Kawm, Ro Cung far nu Van Thio, Sui Tial pa hi lei/ dum tuah mi an si. A tu lio puparo ti lio ah an kong ceih a har lai a tu lio Acre 100 le 676 hmun kong hmanh a dih kho lo.

A Tlangpi In

  • Nawi in ti kan lak lai ti mi cu a si kho lo a that lo nak a tam tuk.
  • University hmunhma a hrawh lai (Geologist report um cang)
  • Vice President nih 2 billion an kan bomh zong ah (8)billion ho hmanh nih an thawh lai lo (a herh lo caah).
  • Hakha dawh nak tlonlen nak a rawk dih lai.
  • Pupa ro lei le hmun hma ah upadi zoh piak ngai ngai a hau.
  • Khuahel lam le vanlawng ground zong a rawk dih lai.

Tu nai August thla chung Hakha vawlei a zoh mi Geologist Dr.Myint Soe Deputy Director General te zong kan zoh pi hna i upa nih an kan zoh ter caah a si ko. Nawi nak in nelpa tampi a tha deuh an ti i ruahnak peknak an tial tak.

Mah chung ah cozah le private pawl ca zong a herh lo mi hnorsuannak a chuah khawh caah ruah a herh tiin ka langh ter. Nawi rili fate tuah a tim pawl zong nih Hakha kong hi fak deuh in ruah a herh ka ti. Ti din ding kong cu timit le Lai va a um ko. Pawngkam tiva te te zong an um len rih

 

Ral Kham

Khua Nu Pa Le Hmunhma Kong Ceihmaitu

7.10.2020

 

Note: Catialtu Hmuhning a si_ Editor

Na ruahning rak langhter ve.. (Leave a comment)

%d bloggers like this: