Hakhathar Kat-ta-ya Phahding Bawmhnak Pekmi Nihin Tiang Riantuannak Thawk Lo In An Chiah Sawhsawh

City Hunter| 2018 April 20| 2017 kumthawkka, Hakhathar sang chung lam kat-ta-ya phah ding in bawmhnak pekmi kat-ta-ya le chawva cu nihin (2018 April 20) tiang rian tuanchuahnak tuah lo in an chiah sawhsawh rih ko tiah kan theih.

Hakhathar, Lungphun tlang le Nahau tlang kar sangchung lam kat-ta-ya phahpiak ding tiah Vice President Henry Van Thio nih 2017 February thla ah a rak ti. Cu ruang ah cu lam phahnak caah Nah-tah-lah nih kat-ta-ya ton 170 le Zatlang Nunchanhnak le Hmunhma Chiahpiaknak Ramkomh Minister hlut nih Ks. sing 500 hlut an rak hlut colh. Asinain, kumkhat a rauh hnu, nihin tiang kat-ta-ya an phah rih lo tiah kan theih.

Hi kong he pehtlai in Hakhathar khuabawi Pu Tawk Lian nih, “Hakhathar sang chung kat-ta-ya phah ding in bawmhnak a kan pekmi cu tengki pung in an kan chiah hnawhnak a sau tuk cang. Atu zong tengki pung cu an ril ko, a chawrh in an kan chawrh. Kumkhat renglo a rau cang nain zei kat-ta-ya phahpiak a um lo caah tukum fur chung cu nawncek lakah thutdir le khuasak kan hau rih ko lai. 2018 March thla penguk zung ah tuahmi zungkip upa vialte meeting ah pengkomh zunguk chang nih Hakhathar kat-ta-ya phahpiak ding in ramkulh cozah nih timh a si tiah zapi theih in a chim ve thiamthiam ko. Asinain nihin tiang cu zei kat-ta-ya phahpiak zong kan tong rih lo. Sipin budget ks. sing 4000 in yepun, luti luannak le retaining wall pawl belte cu tlamtlingte in an kan tuahpiak dih cang” tiah The Chinland Post ah a chim.

Hakhathar kat-ta-ya phahding rian hi a taktak ahcun 2017 thal chung ahkhan rak tuahding le atu ahcun aa lim dih cikcek ding a si cang tiah kan theih.

Hakhathar sang in upa pakhat nih, “Kannih Hakhathar cu harton ruang ahhin hika hmun ah khua a sami kan si. Cu ruang ah cozah nihhin biapi tuk ah an kan ruat lo i bawmhnak pek ciami kat-ta-ya hmanh kumkhat renglo an chiah sawhsawh men ko. Sangthar tlakkami a si caah nawncek a tam khun, nikum kha furpi chung ah kan harsa tuk. Nawncek lakah caw le naa bang kan tlongleng, kan fale harsa tuk in sianginn an kai” tiah The Chinland Post ah a chim.

Hakhathar lam kattaya phah dingin Vice President Pu Henry Van Thio nih a tinak cu Hakhathar an zohpi lio ah khan hi lam lei hin amah Vice President Pu Henry Van Thio nih a kirpi hna i vawlei a khuttuk le lam a chiattuk caah tubantuk in a fial hna nak hi a si. Vice President cu hi lam in kal le zoh ding in upa te timhciami siloin an ruah loning in a kal bia a rak si tiah Hakhathar upa pakhat sin in TCP nih kan theih.

Na ruahning rak langhter ve.. (Leave a comment)

%d bloggers like this: