Halkha Kokek Kan Lungput Le Kan Sining; Tawk Awi Thang

Tawk Awi Thang| 2019 January 31| Tu lio cu Halkha kokek (Native) pawl timi bia a tam ngai i Halkha Kokek (native) kan  lungput pawl cu  atanglei bantuk in an si.

  1. Halkha kokek nih dinfelnak tel lo in ṭhancho kan duh lo. Dinfelnak tel lo i ṭhanchonak cha cun, dinfelnak te he um i ṭhancho lo kan duh
  2. Halkha kokek minung cu eihmuar le ziknawh a hmangmi Miphun kan si lo. Cu ruangah cun kan pupa hna nih cozah rian saang le bawi lianngan an rak ṭuan le an rak si zongah an rum lo. A tu lio cozah rianṭuan mi hna bantuk in mah pumpak hlawknak caah rianṭuan mi Miphun kan si lo.
  3. Kan pupa hna chan in fiar le tlei a hmang mi Miphun kan si lo i innka hmenh an rak hrenh bal lo. Kawl Miphun an hung kei hnu lawng in Halkha ah fiar le tlei a um. Kawl mifiar phun a ṭanhtu hna cu an mah bantuk nan si ve.
  4. Halkha kokek minung nih kanmah te cio in thing le ram kan i ngeih dih hna. A ngei lo mi kan um hmenh ah a ngeimi hna sin ah ṭha te’n kan i hal i dawtnak le remnak he lungtling te’n kan i pe kan i chaan. Buaibainak kan ngei bal lo i kan tiram zong a him. Halkha Ti le Ram a hrawktu cu a hodah a si? Ahodah nan si? Rak i tuak uh!
  5. Kan pupa hna nih Rung le Met an rak biak lio chan hmenh ah mipem le sathlai dawt hi an thlacamnak ah an rak nenhchih cang mi si. A tu Khrihfa kan si hnu chin chin in cun chim hau lo a si cang.
  6. Ramukbawi hna nih khua le ram an rak uk ah hin an ṭhu sawh sawh lo. Khuachiah le rawlrel an rak laak mi tiang lawng hin ruat hlah uh, sa le ral vialte an rak in humhak mi hna le an rak in diarkamh mi hna tiang zong khin ruat chih ve uh.
  7. 1948 kum ah ramukbawi pennak phung an rak hloh. Sihmenhsehlaw cu an rak holh mi phung hna cu peng le tlaang an rak uk mi le khuachiah rawlrel an rak laak mi hna kha a si. Thing le ram kan ngeih mi hna he zeihmenh aa pehtlai lo. Cun ramukbawi lawng nih thing le ram hi an ngei hlei lo i kokek minung paoh paoh nih kan ngeih cio ngawt dih ko hna. Cucaah nihin ni tiang Halkha nih kan thing le kan ram kan ti khawhnak hi a si.
  8. Kan hmun cia, kan vawlei cia le kan ram cia ah miphun dang nih duh paoh in tuah le to kan duh lo. Ralkap nih an rak kan uk lio hmenh ah chimnak nawl le relnak nawl kan rak ngei lo. A tu cu zapi nih thim mi cozah an si cang i kan duh mi paoh chimnak nawl le relnak nawl kan ngei cang.
  9. Miphun pakhat kan si ve i kan mah te’n phung le lam kan i ngeih ve ko. Kan mah phung le lam te kan zul i Halkha khua kum zaruk leng a si cang mi le kan thingram kong ah buaibainak kan ngeih lo bantuk in Halkha nih Kawl mifiar phun phung kan herh lo.
  10. Halkha kokek nih hin kan pupa hna chan in mipem le sathlai a rak daw mi kan si cang. Halkha ṭhancho ter nan duhnak cungah kan i lawm, Halkha zawnruahnak he bia nan chim i kan i lawm, kan mah tluk te’n Halkha nan dawt i kan i lawmtuk. Halkha nih kan vawlei kan in sianhtuk ko hna. Sihmenhsehlaw, mah pumpak hlawknak caah le duh fah hakkauhnak caah kan duh lo. Sifaak santlai lo mi hna zawnruahnak, dawtnak , velngeihnak, khua le ram zawnruahnak le dinfelnak he ṭhancho ter kan duh. Halkha kokek nih Dinfelnak he rianṭuan kan duh. Khrihfa na sinak kha i philh hlah.

Catialtu: Tawk Awi Thang

Biakilh: Hi cabia cu cahram tialtu Tawk Awi Thang hnatlaknak in zapi caah taarmi a si.

Leave a Commnet

%d bloggers like this: