Harsat ruangah Paletwa ralzam minung 37 Tikir in Hakha ah an i thial

0

Salai Lian| 2020 December 31 — Tikir khua a ummi Paletwa ralzam minung 37 cu harsat ruangah December 20 ni khan khualipi Hakha lei ah an i thial than.

Hi kong he pehtlai in anmah ralzam pawl Hakha a phanh hnu ah tawlreltu pakhat nih cun Tikir khua ah tangka kawl hawlnak a um lo caah a si tiah a chim.

“Riantuan ding a um chun zong, Company nih anmah minung an tuan ter dih hna tik ah Ralzam chungkhar cu rian rang in lim an duh caan i thla khat chung ah ni 3-4 te lawng an tuan kho. Cuchung cun cite le hmanphek cawk nak kan ngei i, a har tuk an ti caah an rak i thial mi a si.”

Tikir in Hakha an rak i thial nak kong he pehtlai in, Paletwa ah kum 31 a um hnu ah Hakha ah a rak i thial mi Saya Ram Hnin nih hi tin a chim; “Hakha ah Kuli tuan ding a um deuh lai tiah ruahchannak an ngei. Tikir ah, Facang tu cu an ngei ko. Nain, cheukhat cu thuanh ding puan zong an ngei lo. Zaan sml. 3 hnu in cun khua dei lak mei an to i, an thu mi chungkhar tiang an um.”

Tikir in Hakha tiang rat nak ah Mawtaw an hlan man ah, minung pakhat 15,000 an thawh i Hakha lei ah an rak i thial. Mawtaw man pek awk a ngei lo mi Hakha ah thial a duh mi inn chungkhar 4 tluk an tang rih. Tutan a rak i thial mi hi an zapi in Khumi lawngte an si. Hakha an um nak ding caah Inn hlan man Kyat 20,000, 30,000, 35,000, 40,000 tluk an pek cio. Inn khat belte cu inn ngeitu i nih, 40,000 in an i caih ko nain, thla 2 chung pek lo ding in a dawt hna tiah Chin Human Rights Organization (CHRO) ah a tuan lio mi Saya Ram Hnin nih a chim.

Tikir Thar, Thantlang Peng by The Chinland Post

A rak phan mi chung ahhin, a harsa khun mi an um. Chungkhar ah tar pahnih le an fapa tiah minung 3 khuasa chungkhar an si. A putar hi a hna chet, an fapa cu rian a tuan ko nain a vikva tha mi le hawi a lo tuk mi cu a si lo. An chungkhar tar nu le tar pa an si i, an fapa nupi hi Paletwa ah a tang, an kal tak fawn tiah theih a si.

“Paletwa in Tikir, cun Hakha an rak phanh tik ah, umkheng, puan le fenhaih an ngei lo. Cucaah, Dawrthar, Calvary Sang nih puan (zun 10 fai), Angki, hni le hruk aih kan pek hna. Nain, chuankhinnak ah umkheng bel cu an ngei rih lai lo” tiah Calvary Sang upa nih a chim.

Tikir in an eidin ah facang cu an rak i ken. Cun, tu ah fenheih cu pek in an ngei ko nain, riantuan ding tuhi an har lai tiah Hakha an rak phanh tawlreltu nih an chim.

“An dihlak hi 37 an si. Chungkhar in 7 an si. An rak i thial than nak a ruang bik cu Tikir ah inn lo, eidin ah facang cu an ngei ko tiah Hakha an phanh hnu ah tawlreltu nih a chim.

Hi ralzaam hna cu Tikir an um chung ah an ei bikmi cu Banhla zip a si. Bawmhnak tangka zong an pe set lo. Anmah an tawlrel ning in an sia rem tik poah ah, Kyat 20,000-30,000 an pek tawn hna tiah kan theih.#

About The Author

Na ruahning rak langhter ve.. (Leave a comment)

%d bloggers like this: