HBDO Nih Kum 14 Chung Thisen Hlutu Zapi Upat Laksawng Peknak An Tuah Lai
Salai Cung cung |2018 October 30| Hakha Hope Blood Donor Organization (HBDO) nih aralaimi 2018 December 8 Carson Hall ah kum 14 chung thisen hlutu vialte upat laksawng peknak an tuah lai tiah kan theih.
“October 27 ni Hakha CACC zung ah Hakha peng le Thantlang peng vialte kan auh hna i tonbiaruahnak kan ngei. Hi meeting ah minung 64 hrawng lawng an kai kho. A kai kho lomi khua pawl zong kha ca in kan tial lai i kan pek dih than hna lai. Hi tonbiaruahnak kan tuahnak a ruang cu aralaimi December 8 ah kum 14 chung man lo in thisen hlutu vialte upat laksawng peknak kan tuah lai. Cu tuahnak ah cun Sing 100 kan herh caah thisen hlutmi hna chungkhar le khuami hna nih mah le siantawk rak hlu ve ding in kan auhmi hna a si” tiah HBDO Director Pu Cung Hu nih The Chinland Post ah a chim.
“Hi laksawng pek dingmi pawl cu thisen voi 20 cung a hlu cangmi pawl an si lai i roca kan pek hna lai, tangka cu a fiang rih lo. Voi 20 tang thi hlumi paoh cu voikhat te an hlut zong ah Angki pakhat pek an si lai. Hi Aangi laksawng caah hin Sing 40 kan dih, cun adang dang a herhmi le laksawng caah hin a tlawmbik Sing 100 kan dih lai. Hi upak peknak le roca laksawng peknak ah hin Chin ramkulh Social Affair Minister kan sawm. Cun Lai Media zong kan sawm hna lai. Cozah zung lei upa pawl zong kan sawm dih hna lai. Tu hi zeidang vialte cu kan tlamtling dih cang, tangka lawng a chambaumi a si cang” tiah a chim chap.++++
About The Author
