Hakha HBDO Nih Mizaw Miharsa Bawmhnak Caah Ks. Sing 400 Renglo An Hmuh
Salai Cung Cung | 2018 August 13 | Hakha HBDO ( Hope Blood Donor Organization) riantuannak caah ti in bawmhmi cu 2018 July 31 tiang ah Australia le Laitlang chungin nun samhtu hna sin in an hmuhmi zapi hi ks. Sing 490 a si. Hi chung in HBDO nih kumkhat ah ks. sing 40 hrawng lengmang in mizaw miharsa an bawmh hna tiah kan theih.
“Hi HBDO cu 2004 December 1 in rak thawkmi asi i cu lio ah cun Cung Hu ti in keimah innchungkhar (family) tein ka rak tuahmi asi. Cun caan a vung kal hnu ah HBDO (Hope Blood Donor Organization) ti in kan thlen. Hi kan zung cu 2014 July 10 ah cozah nih hnatlakpinak register a kan pek. Hi rian kan rak thawkka te ah hin kanmah innchungkhar lawng te nih rian hi tuanvo kan rak lak dih. Thi hlutu le mizaw pawl kawl ding tibantuk in aherhmi paoh ah kanmah innchungkhar tein caan sau pi kan rak cawlcang. Can sau avun kal hnu lawng ah zung riantuantu (staff) pawl le cun tangka bawmhnak pekmi pawl hi an rak um. Caantlang in HODO zung riantuantu 5 kan si i Committee in cun minung 10 kan um” tiah HBDO Chairman Pu Cung Hu nih The Chinland Post ah achim.
Hi HBDO caah bawmhnak a petu hna cu, Hakha khua chungah hin minung 2000 nih thlafatin te thlakhat ah 1000 an pek i a zapi achuakmi hi thlakhat ah 2,000,000 asi. Cun 2018 August 10 ah Hakha CB Bank nih Sing 50 an bawmh hna i Laitlang ah 2018 July 31 tiang ah azapi bawmhnak achuakmi hi Sing 190 a si. Cun Australia lei in Sing 300, adihlak fonh in 2018 July 31 tiang ah hin sing 490 a chuak tiah kan theih.
“Hi HBDO bawmhnak cu 2018 July 31 tiang ah Ks. sing 490 alut i kumkhat ah punghmang tein Sing 40 hrawng hi kan hman than lengmang. Hi HBDO nih a biapi in thil phun 5 kan tuan.
1. Thi Hlut
2. Tangka in bawmhnak pek
3. Oxygen Service
4. Motor in mizaw phorh
5. Mithi vuitu ngeih lo mi paoh vuipiak tibantuk rian hi an si.
Hi bawmhnak ah hin cozah lei in zeihmanh bawmhnak kan hmuh lo. May 20 ah khan ka facebook ah Laimi hna sin ah (Laimi kan ti tikah kan rian tuannak nih thahnemnak apek khawhmi umnak hmun tiang lawng) ca ka tial. Mah mizaw phorhnak le mithi ruak phortu motor pathum, pali cawk kan duh caah tiin bawmhnak ca ka tial nain tu hi thlathum si cang. Aho sin hmanh in bawmh kan ton lo caah Hakha CB Bank kha ka va chimh hna i Sing 50 bawmhnak a kan pek. Hakha ah hin mizaw phorhnak motor le mithi phorhnak motor hi kan chambau tuk. Kanmah kan ngeihmi motor hi a chiat tuk cang caah kan zuar i athar motor pathum li cawk kan i timh caah ka facebook ah ka post mi hi asi” tiah Pu Cung Hu nih TCP ah a chim.
“Tu lio kan i timhmi cu motor cawk hi asi. CB Bank nih Sing 50 bawmhmi tangka hi kan khawn rih lai i adang bawmhnak achuak rih ding kan hngak rih lai. Hi Sing 50 lawng cu azat lo, bawmhnak kan herh rih ko. Zapi kutsamh cio ding in kan sawm hna. Hi kan riantuannak ah hin ramleng lei in abik in bawmtu cu USA Laimi le Australia Laimi an si. USA hi 2010 ah khan an kan bawmh, Norway hi 2015, Denmark hi 2015 le Germany hi 2015, cun a caancaan te ah bawmhtu hna hi Newzealand, Malaysia, Singapore, Japan tiin ramleng lei in bawmhnak kan hmuh pah tawn” tiah a biapeh ah a chimchih.
About The Author
