HBDO  Nih Thisen Thol 5000 Leng An Khawn I Mizaw 2000 Thisen A Pek Cang Hna

Salai CungCung|2019 August 5| Hakha hrambunh Hope Blood Donor Organization (HBDO) nih rian a thawkka in 2019 August 2 tiang ah thisen thol 5040 an khawn cang i mizaw minung 2000 thisen an hlut cang hna tiah kan theih.

“Thisen hlutnak ruang ah ngandamnak lei thinphan ding cu a um lo, a ruang cu Siibawi te nih tha tein an chekfel hnu ah a hlu kho ding dirhmun a simi lawng nih an hlut caah thinphan awk a um lo. Thisen hi mizaw caah a biapi tuk, an nunnak bak a si, thisen hlut lo cun an thi ko lai. Cucaah mino ngandamnak a tha ko mi nih cun thisen hlut hi i zuam cio hna u sih” tiah HBDO ngeitu Pu Cung Hu nih The Chinland Post ah a chim.

Thisen hlutnak kong he pehtlai in Siibawi hna nih;

  • Professor Dr Thida Aung(YG) nih, Thisen petu um lo ngai hin cun Siibawi te operation tuah thiamnak cu san tlai lo a si.
  • Zin Ko Ko Aung (Hakha Sii in Uk) nih, Siibawi lo zong nih mi Nunnak khamh khawh a si ko. Cucu thi hlutnak in a si.
  • Bawi Cin Tial (OG,Hakha Sii in) nih, Thi phai nih a lakmi nu hna cu chikkhat te ah an nunnak a dih kho.
  • Thida Win(OG,Hakha Sii in) nih, Mizaw nih an herh lio caan thengte ah an herhzat thisen cu a caan tanh in HBDO nih a pek khawh hna caah Sii in um caan a tawiter i Mizaw nih a dih hnga phaisa zong a tlawmter ti in an chim.

“Hakha ah ruak vuai tu ngei lomi hna an ruak kan vuaipiak hna. Cun Oxygen bawmhnak  zong kan tuah chih, mizaw hna an inn ah siseh khual kal pi in Mandalay, Yangon lei  siseh Oxygen cu free tein kan pek hna i kumkhat miung 150 kar hrawng an si. Mtithi ruak a thut nakhnga lo cool box zong kan tuah. Cun operation tuah ding in Mandalay lei le Yangon lei a kal mi hna caah online in bawmhbnak kan halpiak hna i minung 18 hrawng hi tangka Sing 400 leng bawmhnak pek an si cang.  Cun bawmhnak a tlawm deuh mi cu Hakha Sii-inn ah tangka 20000 in Sing 1 kar hi minung 1000 leng bawmhnak pek a si cang. Hi bawmhnak kan pek hna mi cu NGO, Cozah, Company lei tibantuk in zeihmanh bawmhnak aa tel lo, sifak santlai lomi hna nih tangka 1000 cio an rak thawhmi a si” tiah Pu Cung Hu nih a chim chap.

HBDO ah thisen tambik a hlutu hna cu, Saya Thawng Cung Nung nih voi 43, Salai Sang Cungnih voi 43, Nu Huai Siang Cin nih voi 24 an si tiah kan theih.

Leave a Commnet

%d bloggers like this: