HCMF Nih Thihloh Tikah I Zohkhenhning Zulhphung 16 Biakhiahnak An Tuah
Salai Cung Cung|2019 March 13| Hakha HBA (Hakha Baptist Association) zung ah kumkhat voi 2 tuahmi HCMF (Hakha Christian Minister Fellowship) tonpumhnak cu March 11 ah an tuah i thihloh tikah i zohkhenhning zulhphung 16 biakhiahnak an tuah.
“HCMF nih a luancia caan suaipi ah Hakha khirhfabu zapi nih zulh dingmi kan rak ngeihmi a um. Ma cu tutan tompumhnak ah thihlohnak tontik ah zohkhenhnak kong kan ceih. Cu kan ceihmi pawl cu, thihlohnak tontik ah zeitin i vuai ning, caanhman ning tibantuk pawl kan ceih” tiah HBA G.S Rev. Nawl Cung Lian nih The Chinland Post ah a chim.
Hi tonpumhnak ah ceihmaimi hna cu;
- Zing suimilam 7:00 hlan ah a thimi cu a ni ah vui siseh,
- chungkhat nih an theihthiam ah cun 7:00 hnu a thimi zong vui khawh ding.
- Hngah lo awk a tha lomi an um ah cun zankhat lawng chiah i a thaizing ah vui siseh.
- Thih loh tikah zuu pek um hlah seh.
- Mithi inn ah chungkhat, sang le veng le khual lawng nih rawl ei siseh.
- Mah khua siseh, hmun dang ah siseh, a thimi caah lungdonhpiak cu tha kan pe lo.
- Thih ni a thaizing thlan kal ah sathah lo ding.
- Thlan kalpi tu hna caah lakphak le changreu tiang lawng timhtuahpiak ding.
- Thih camtuak ah Pastor te sawm in thlan kal thlacaam um hlah seh.
- Thlan tlak hnu ah sathah in Pastor te saya-ma sawm in thlan kal um hlah seh timi an si.
- Amah tein aa thatmi cu thlan hmun kal hlan chungkhar caah Pathin bia in hnemhnak le thlacam piaknak ngeih hnu ah thlan hmun ahcun thlacaam lawng tuah siseh (khrihfa phung in ruak vui lo ding).
- Ruak zan ah khua a deimi caah sanpiuh le zinglei ah lakphak leng ah a dang tuah lo ding.
- Zuungngaih par chiah lo ding.
- Thlan thial tikah vui si loin thlacamnak lawngin caanhman ding.
- Thlan thial sathah in rawldum tha kan pe lo.
- Chungkhar hmundang (ramchung, ramleng) ummi cu thlantlak ni dah ti lo, khrihfabu min in i thutpi lo ding. Cun, bul cohlannak zong tuah lo ding (an duh si le an chungkhar sin te ah pek ding) an si.
A dang a tangmi zulhphung cu EC nih zoh thante ding in tonpumhnak ah biachahnak an ngei tiah kan theih.
About The Author
