HCMF Nih Thit-Um Tikah Zulh Awk Phun 22 Fehternak An Tuah

Salai CungCung|2019 April 24| Hakha Christians Ministers Fellowship (HMCF) general meeting cu April 23 HBC ah an tuah i Hakha Khrihfabu kip nih thit-um puai tuah tikah zulh dingmi phun 22 ferternak an tuah kan theih.

“Kan hnulei ah thih loh tikah i zohkhenhnak kong kan ceih cang i tu hi thit-um puai tuahnak kong kan ceih than. Hi tonpumhnak ah tuan deuh thit-um tikah zulhphung kan rak sermi pawl fehternak le a thar tampi kan chap. Kum dang ah cun thit-um le thihloh tikah zohkhenhnak kong zulhphung 15 hrawng lawng kan rak ngei nain tutan ah a thar tampi kan chap. Hi bantuk zulhphung kan tuah cu vawilei lei uknak lei upadi bantuk si lo in khrihfabu kan si ve tikah kan nunphung pawl hlawt awk a tha lo mi tampi a um. Asinain khrihfa kan si bantuk in zulh awk tha lomi tete zong an um than ve caah pastor pawl nih kan ruah i hi tin kan tuah ah a tha bik lai tiah ruahmi in hi zulhphung kan fehter hi  si. Hmailei ah cun caan hi aa thlen lengmang caah tu kan sermi zulhphung hi remh ding zong a um than te lai i chap ding zong a um than lai. Cucaah zumtu kan si bantuk in pastor te nih a tha tiin tuahmi kan zulh dih ah cun Pathain thluachuah kan co ko lai” tiah HBA-GS, Rev. J. Nawl Cung Lian nih The Chinland Post ah a chim.

Thit- umnak tuah tikah zulh awk hna cu;

  1. A thiang mi kutsih thitumnak tha kan pek. A thiang mi kutsih thitumnak kan timi cu nupi, va he aa then bal lomi, nu le pa kar ah nu le va sinnak a ngei rih lomi, tipil a ingcia mi an si. Cu bantuk mi hna cu Biakinn ah kutsih thitumnak tuah khawh siseh. Thihnak nih a thenmi hna zong nupi/va ngeih than a duh ahcun a thiangmi thihumnak Biakinn chung ah tuah khawh siseh.
  2. Kutsih thitumnak tuah tikah Lai thilthuam tha kan pek.
  3. Kawi le Maw cu a tambik minung pathum veve tiang lawng siseh.
  4. Panpar vorhtu ah minung pahnih cung si hlah seh.
  5. Biakinn chung ah aa thi-um mi hmanthlak taar um hlah seh.
  6. Pangpar tamh ning zong a tlawm khawh chung in tamh siseh.
  7. Biakinn tamh tikah Pulpit cung i van mi mei (Phazawngdan) leng ah a dang tuah lo ding le a hlei a hluat in Biakinn tamh lo ding.
  8. Pulpit cung mei vannak, aa thi-um mi meivannak leng ah a dang nih meivannak tuah um hlah seh.
  9. Kutsih thitum tuah tikah kuh le hnamhter, tibantuk cu tha kan pe lo.
  10. Kaphnih lei biachimnak tuah ti lo ding.
  11. A tli mi, aa dawi mi hna cu chungkhar kaphnih lungtlinnak a um lawng ah pastor nih inn ah thlacamnak tuah piak siseh.
  12. le Va aa then ciami nih nupi thit, Va ngeih than a duh ahcun an i thennak kongah lungtlin veve nak a fian hnu lawng ah inn ah thlacamnak tuahpiak siseh.
  13. Khrihfabu aa khat lomi chungin kutsih thit-umnak tuah tikah mah le pastor theihpinak um seh.
  14. A lang thit-umnak (Parcel kuat) a um tikah kutsih thit-umnak bantuk si loin, inn ah thlacampiaknak in tuah siseh.
  15. Man manh a duhmi nih phunthawh le Arsathah lawng tuah siseh.
  16. Arsa Zuu tuah lo ding.
  17. Rawl danghnak cu a bit khawh chungin tuah i zuam siseh.
  18. Thit-um rawldangh lio hlasaknak tuah tha kan pe lo.
  19. Thit-um tlawmpek (letphoih) in thilri peknak in tangka pek hi tha kan pek.
  20. Thit-um zan Mo thlah tikah Khrihfa phung tein pumhnak tuah siseh law pumh dih hnu ah paih, laam, sathluak, zuudin le nuamh um hlah seh.
  21. Puai tuah zan ah thil fim dih in a thaizing riantuan le rawl ei thannak tuah lo ding.

Mo thlah, Don tikah puan kham, suithi kham tibantuk tuah lo ding tiah thit-umnak kongkau zulhphung 11 cu HCMF nih General meeting ah biachahnak an tuah tiah kan theih.

Na ruahning rak langhter ve.. (Leave a comment)

%d bloggers like this: