High Class Nih Fur Chung Kawlram Chung Paoh Pastor Te Bus Ticket Alak In A Pek Hna
Salai CungCung|2019 August 26| High Class Express nih Fur chung August thla thawk in September thla tiang Hakha le Yangon kar telh in kawlram chung ah biaknak lei kip pastor pawl cu Bus Ticket alak in an pek hna tiah kan theih.
“Tubantuk in kan tuahnak a ruang cu, fur chung bawmhnak kan tuah khi a si. Hi pastor te alak in Bus ticket kan tuahpiak mi hna cu Khirhfa lawng si lo in a dang biaknak dang a si mi Buddhist pawl zong an i tel ve ko. Biaknak lei in Pastor sinak ministry Card a ngei paohpaoh nih Bus Ticket cu alak in lak khawh a si. Tu tiang ah Hakha lei in cun an um rih lo nain Yangon to Hakha ah cun pakhat a um cang” tiah Hakha High Class motor Gate in tuanvo ngeitu pakhat nih The Chinland Post ah a chim.
“High Class nih a dang promotion kan tuahmi cu, Ticket man voi dang 35000 le 300 in lak tawnmi kha 32000 le 300 in a si i rawl danghnak tu kha a um ti lo. Cun minung pakhat min lawng tein Ticket pa 10 kan sin ah a chuahpi khawh ah cun alak in voikhat kal khawh a si. Hmailei zeitindah promotion kan tuah lai ti cu chim awk a tha rih lo a mah le thil si ning hoih in kan kal te lai. Mizapi caah a tha bik in kan i zuam peng ko rih lai, mizapi lei zong nih kan palhnak le kan tlamtling lonak tete rak kan theih thiam u law, kan mah lei zong nih hi nak tha deuh in kan i zuam chin lengmang lai” tiah Hakha High Class motor gate in tuanvo ngeitu pakhat nih a chim chap.
High Class Express cu Chin ramkulh chung ah Hakha to Yangon le Yangon to Hakha hi a si. Zarhkhat chung ah Zarhpi ni nikhat lawng i dinh in nidang vialte cu an chuak peng. High Class Gate cu Hakha ah 2018 January thla in rak hunmi a si tiah kan theih.
About The Author
