Chin Christian University (CCU) Konglam {History of Chin Christian University}

0

Henry Siang Kung| President of CCU| 2019 September| Chin Christian University Konglam

Sianginn tlangtar:       A Nung In Pekchanmi Raithawinak (Rom 12:1)

Sianginn chunmang:   Nunnak Duhdim Caah Fimthiamnak (Johan 10:10)

2019-20 tlangtar  :      Pathian Riantuan Awkah Thuamh (Efesa 4:12)

Chin Christian University (CCU) tuanbia cu Lai Khrihfa tuanbia he ṭhen khawh a si lo. Abik in Lairam um Baibal sianginn hna he ṭhen khawh a si lo. Baibal sianginn tuanbia ah Lairam um Baibal sianginn hna lakah CCU cu a kum a upa bik zong a si i a no ngaimi zong a si ti khawh a si. Zeicatiah Hakha khua ah Baibal sianginn hi voi li khengte dirh a rak si i CCU cu a voilinak sianginn a si. CCU a si tiang Hakha khua i dirhmi Baibal sianginn hna cu a tang lei hi an si.

Chin Christian University (ahlan CCC)

Pakhatnak: Chin Hills Bible School (1928-1931)

Kum1928 March thla i tuahmi Chin Hills Baptist Association meeting ah Hakha khua ah Baibal sianginn dirh ding in bia an chah bang in May 1, 1928 ah Chin Hills Bible School cu dirh a si. Hruaitu bik cu Chester U. Strait a si. Siangngakchia 13 chung ah Tedim 4, Falam 4, le Hakha peng in 5 an si. Meeting an rak tuah lio ahhin sianginn cu kum li chung lawng tuah ding, siangngakchia 12 lawng Hakha, Falam le Tedim peng in pali cio thim ding, Hakha holh in cawnpiak ding ti a rak si.

Ca an cawn tikah blackboard cung ah Strait nih a thawk in a dongh tiang a ṭialpiak hna i siangngakchia nih an i ṭial ve. Cuti cacawnnak nih hlawknak phun thum a umter. Pakhatnak ah siangngakchia nih Strait a Laiholh kha an remhpiak khawh. Pahnihnak ah siangngakchia nih kum li chung an ṭialmi cauk cu khua ah an kirpi tikah Baibal hrilhfiah bantuk ah an hman khawh. Pathumnak ah Strait nih cuti i an ṭialmi cu a hnu ah cauk ah zapi ca ah a chuah khawh.

Chin Hills Bible School cu September 1, 1931 ah an khar. Cu ni ah awnnak thlamtling a hmumi minung 13 hna cu Kham Khaw Khai, On Khaw Khai, Thang Lian, Kim Ngin, Than Kap, Lal Hrim, Ca Luai, Lian Thang, Than Sai, Leng Kham, That Nawn, Tai Tam, le Za Ling an si.

Hakha khua ah 1899 thawk in missionary an phan. Kum saupi an um. Asinain Hakha khuami nih an riantuanmi an hngalhpiak ngaingai hna lo. Baibal sianginn a hung um hnu ah siangngakchia pawl zarh khat cio khat thlacam in an vahmi nih mission rianṭuannak ah theitlai tampi a umter.

Pahnihnak: Hakha Bible Training School (1948-1950)

Vawlei Ralpi Pahnihnak a hung dih tikah missionary pawl zong Lairam ah an rak kir ṭhan i Franklin le Phileda Nelson nih Tedim khua ah 1947 May thla ah Baibal sianginn an dirh i 1950 ah an khar.  Hakha ah Johnsonte nupa nih 1948 June ah Hakha Bible Training School an dirh ve (Johnson, vol. 2, 846). June in October tiang kum thum chung an cawn.

1948 May 15 ah siangngakchia pawl an hung phan i umnak inn (hostel) le cacawnnak inn vialte anmah nih an remh ṭhan. Ngaidi cihmi inn chia taktak khi an si. A nganbik inn cu avang lam thum, atung lam ruk (18 ft x36 ft) lung vampang, a cung ngaidi cihmi inn a si. Cerpai pakhat hmanh a um lo. Cu inn ah cun pa siangngakchia 26 an it. A dang 13 cu an i tlum ti lo i Dr. Strait nih ar-inn ah a rak hmanmi lung vampang inn hmete ah an it. Ar zuatnak inn cu an vun thianh zong ah minung vung ihnak taktak ah cun a rak har ngai ko lai dah.

Kum 1948 June 1 ah Sianginn cu an hun. Siangngakchia anmah thazaang in cacawnnak le umnak hmunhma zong sersiam a si caah Johnson le Betty nih caw an thahpiak hna i Pathian sin ah lawmhnak bia an chim. Siangngakchia a tam bik 30 tiang lak ding ti a rak si i thla khat ah siangngakchia pakhat ca facang pawng 50 in an i cawk cia. Asinain siangngakchia an tam caah facang nih a nguh hna lo i kum khatnak cu 1948 Sept. 24 ah an khar.

Siangngakchia kong ah theihtlei a simi cu Tedim Baibal Sianginn ahcun tang li awng lawng cohlan an si i Mirang holh in chimh an rak si. Hakha tu ahcun Hakha holh tein cawnpiak an si i siangngakchia zong an catang a niamdeuh mi an si. Siangngakchia 39 chung ah Falam in 12 an ra. A no bik ah kum kul in a tar bik kum sawmli luan zong an um. Cun pastor kum saupi a ṭuan cia zong an um. Johnson hmuhning ah siangngakchia an dihlak ngawt in kanaan (Arithmetic) an thiam lo. Cu caah kum khatnak ah hin kanaan, ngandamnak le music zong an chimh chih hna. Cawnpiaktu cu Johnson, Betty, Lal Hnin le Sang Ling an rak si (On the Back Road to Mandalay, 112).

Kan chim cang bang in Tedim Baibal sianginn cu Mirang holh in cawnpiak a si i kum li chung cawn a si. Hakha sianginn cu catang niam deuh mi hna kha Hakha holh in kum thum chung cawnpiak a si. Kum 1949 ah cun David Van Bik zong nih cachimh a bawmh cang hna.

Kum 1950 October 1 ah Graduation Day tuah a si i minung 32 nih awnnak an hmuh. Awnnak a hmumi hna cu: Chan Let, Chan Thang, Chia Er, Chia Luai, Hai Mang, Heng Cin, Hlei Bik, Hmar Thang, Hram Phen, Hrang Mang (kum hnih), Hre Luai, Huat Vung, Khoh Thung, Khua Kil, Khua Ling, Kulh Hmung, Lal Zika (kum hnih), Lian Hei, Lian Hrang, Ni Vung, Nun Tiam, Pa Hrek, San Bil, Ta Kiau, Za Duh, Za Ling, Za Thang, Thang Hmung, That Dun, Thanga (kum hnih), Thio Hmung, Tuang Sum an si.

Awnnak diploma cung ah minthutnak pali an tuah. Cun siangngakchia kha an thiam ning hoih in dot thum ah an ṭhen hna. A thiambik 6 kha sui cakhenh, a changtu 18 kha ngun cakhenh le a tangmi 8 kha cakhenh sen an pek hna.

A cunglei siangngakchia 32 pin ah Zotung lei in a rami Ku King hi ca a cawn bal lo caah Baibal sianginn ah cohlan awkah a rak si kho lo. Asinain kum thum chung an rawl a chuanpiak hna pin ah sianginn zong a kai ve, camipuai tuah lo in kai sawsawh in a kai. Cu caah Ku King cu special certificate an pek ve.

Pathumnak: Chin Bible School (1954-1959)

Johnsonte nuva America ah an tlung i kum hnih hnu 1953 ah Hakha ah an rak ra ṭhan. Cun Tedim khua ah 1953 July 1 ah Baibal sianginn dirh a rak si. Principal cu Hau Go a si i a bawmtu saya cu Lung Cung Nung a si. Falam, Hakha le Tedim in siangngakchia panga cio cohlan ding ti a rak si. Baibal sianginn a min ka fiang lo, Johnson nihcun Chin Bible School ti in a hman (On The Back Road to Mandalay, 180). Tang ruk a awngmi lawng cohlan ding ti a rak si.

Kum 1953 lio in Convention dirh ding tiah rak ceihmai a si i a taktak Chin Baptist Convention (cu lio ahcun Zomi Baptist Convention an rak ti) tiah an fehter hi cu 1954 April 18 Khuasak khua ah a si i OC minung 10 le EC minung 21 zong an thim hna. Chin Baptist Convention (CBC) General Secretary ah Hau Go thim a si i CBC umnak Falam ah ṭhial a hauh caah Tedim khua i Baibal sianginn cu 1954 ah Hakha ah ṭhial a si. Hakha ah 1954 May thla i siangngakchia an rat tikah a kum hnihnak kai ding an si cang i pa 15 le nu 1 an si.

Tedim i Baibal sianginn an hun kum ahhin Johnsonte nuva sin ah Matu peng in minung 6 Hakha an ra phan. Tedim i Baibal sianginn kai ding ah an catang nih a phan lo. Asinain cawn an duh tuk fawn. Cu caah Johnsonte nupa nih Hakha ah an umter hna i ca an chimh hna. Kum 1954 ah Hakha ah Baibal sianginn an rak ṭhial tikah special deuh in an cohlan hna. Kum 1956 ah sianginn min cu Zomi Baptist Bible School (ZBBS) tiah an thlen. Kum1956 December 9 ah awnnak certificate minung 14 (pa 13, nu 1) an pek hna.

Chin Baptist Convention EC meeting, 1958 December 15-16, Tahan ah ZBBS cu Falam ah ṭhial siseh tiah bia an chah i 1959 May 20 ah Falam ah an ṭhial. USA i cacawnnak in a rak tlung mi Rev. Van Bik nih principal a ṭuan.

Palinak: Chin Bible School in Chin Christian College ah (1990-2015)

                         Chin Baptist Convention ram chung hruaitu hna meeting nih Association ngan deuh pawl cu Baibal sianginn an dirh khawh ahcun, dirhnak nawl rak pek a rak si. Cu tikah Chin Christian Literature Society (CCLS) EC meeting, 1989 March 25, Pek Thang inn, Falam ah Thantlang Association of Baptist Churches (TABC) nih CCLS zong nih Baibal sianginn dirh ding a sinak ca an ṭialmi cung ah an ceihmai hnu ah biachahnak CCLS /89-9 ah: “1990 kum June thla in Hakha khua ah Baibal sianginn tuah siseh law diploma in thawk siseh. A hnu CCLS meeting ah Bible School kong cu a dikthliarte in caih si te seh tiah kan hna a tla” ti a rak si. Cu ti cun Chin Baibal School cu 1990 June 11 ah Hakha khua ah hun a si. Diploma program lawng a si i siangngakchia 35 an rak si.

Kum thum a rauh hnu ah a voi 4 nak CCLS Board of Directors meeting, 1993 January 19-21, HBA Office, Hakha biachahnak CCLS-BD/93-24 bantuk in Chin Bible School cu Chin Biblical Seminary (CBS) ah thlen ding in hnatlak a rak si. Asinain a voi 8nak CCLS EC meeting, 1993 May 22, TABC Office Thantlang ah an ceih ṭhan tikah Chin Christian College (CCC) tiah an thlen ṭhan (CCLS/EC-21). Cu bang in CCLS a min zong a voi 2nak CCLS Triennial Pumhpi, 1994 January 8-9, Zion Baptist Church, Hakha ah Chin Association for Christian Communication (CACC) tiah an thlen.

Chin Christian University Sernak

Lu cung meifar vang in rak dirpi mi CCC cu April 3-4, 2015, a voikuanak CACC Triennial Meeting, Hakha Khuahlun Baptist Church, Hakha ah CCU tiah thlen a si. (Note: Hakha Khuahlun Baptist Church cu kum 2015 July thla dongh Hakhapi a cimh tan ah sop cikcek in a rawk ve. Atu ca ka tial caan kum 2019 fur tiang ah hincun biakinn rawkmi cu a um ko rih). Meeting a nihnihnak April 4, 2015 (Saturday) ah biachahnak hi ti hin tuah a si.

CACC-T-9/2015-8: CCC in CCU Thlennak

“Chin Christian College (CCC) cu tawlreltu Board nih a chuahpi bantuk in Chin             Christian University (CCU) an thlen ding i kan hna a tla. Baibal Sianginn lei             pehtlaihnak ah a herh ahcun Chin Christian College (CCC) min hi hman si ko seh tiah      kan lung a tling.”

A cung lei biachahnak tuah ni ahhin Chin Christian University hunnak le Pathian sin pekchanhnak tuah a si. Baibal sianginn lei pehtlaihnak zong ah CCC hmang ti loin CCU hi hman a hung si. Tu ahcun CCU min cu vawlei khuaza kip ah hman a si cang.

Theihpinak le Cohlannak

Kum 1994 in thawkmi BTh program cu vawleipi Baibal sianginn level in cohlan a si khawh nakhnga a lam kawl a rak si. A har ngaimi rian a si i nihin dirhmun a phak tiang dot thum in kan hmuh khawh.

 Dot khatnak

A voi 9nkCCLS EC meeting 1993, CCLS zung, Hakha biachahnak CCLS/EC-22 bantuk in CCU cu Chin Christian Institute of Theology (CCIT) i nifar sianginn (sister school) siding in hal siseh ti a si. Cu kong he pehtlai in Chin Baptist Convention nih 1995, Falam ah theological consultation a tuahmi ah an caih i CCU cu CCIT i a nifar sianginn ah 1996 June thla in cohlan a rak si. Hi can lio ah CCU nih MIT, Insein sin zong ah nifar sianginn sinak hal khawh a rak si ko nain Lairam um Chin Baptist Convention (CBC) ram chung a si mi CCIT thengte an rak thim. CCIT zong nih zawn ruahnak he a cohlan i nihin tiang dawte le remte in rian an ṭuanṭi.

Kum 1990 June 7, CCIT ah minung 7 meeting an tuah i Chin Baptist Convention ram chung Baibal sianginn vialte hawikomhnak Fellowship of Theological Education (FOTE) ngei ding in hnatlak a rak si. Cu FOTE ahcun CCU zong a rak i tel. FOTE annual meeting, CCIT Falam, 1999 April 5 ah FOTE cu Fellowship For Theological Education (FORTE) tiah a min thlen a si. (An caihmai lio ah FORTE cu Burplex Forte he a cafang zong aa lo i a ṭha ngai an rak ti). Nihin ah FORTE chungtel siang inn 7 an si i CBC Triennial Pumhpi ah voting member in cohlan an si cang. Nihin bel ah FORTE cawlcanghnak a dikcak tuk lo.

Dot hnihnak

Kawlram chung Baibal sianginn hawi komhnak  “The Association for Theological Education in Myanmar” (ATEM) BM meeting, 1994 October 6-9, Taungyi ah CCU cu ATEM chungtel ah cohlan a si. (Cu lio ahcun Falam Baibal sianginn CCIT ah ka um lio a si i ATEM EC member ka rak si).  ATEM cu Myanmar Council fo Churches (MCC) chungtel Khrihfabu nih dirhmi sianginn deuh an si. Cun CCU cu Myanmar Baptist Convention nih a ngeihmi Higher Theological Education Department hruainak in MBC i cohlanmi Baibal sianginn a si.

Dot thumnak

Pathian lam hruainak thawng in CCU cu Nichuah Thlanglei Asia Baibal Sianginn hawikomhnak The Association For Theological Education in South East Asia (ATESEA) nih 1995 November ah chungtel tling ah a cohlan. Cu lawng si lo in 2000 November 20 ni ah CCU nih a pekmi BTh degree cu ATESEA nih a cohlan. 2001 June thla thawk in amahte in BTh program a thawk khawh cang. ATESEA nih thlahmi Accreditation Team cu 2004, 2011 le 2015 ah an ra ṭhan. MDiv program 2016 kum ah cohlan a si cang. Arredication remark ah theihtlei cu: “Bochantlak a thawng taktak mi Board of Trustees an ngei; Asinain inn le lo a tlawm, ca cawnnak class an i za lo” ti a si.  Kum 2020 ah Accreditation Team an ra than lai.

Sianguk le Siangcachim le Siangngakchia

 Sianguk: Chin Bible School a rak si lio i Board of Directors meeting, 1989 December 29, Immanuel Baptist Church, Hakha ah CBS cachimtu ah a tanglei hi an thim hna (biachahnak 89/-03).

Principal         :           David Van Bik

Lecturers         :           1. Hla Aung

  1. Zam Mang

David Van Bik cu ram dang a kal lio caah amah a tlun hlan cu J. Mang Hope nih Acting Principal ṭuan seh an rak ti (biachahnak /89-09). Kum 1990 in nihin tiang sianguk a ṭuantu hna:

  1. Jones Mang Hope, DMin (1990 June-October -Acting)
  2. David Van Bik, DD (1990 November – 1996)
  3. John Cuai Sang, DMin (1996 – 1998)
  4. Hla Aung, PhD (1998 April – 2004 March)
  5. Henry Siang Kung, ThD (2004 April —)

Riantuantu

Sianginn dirhka in 2019 June tiang ah siangcachim minung 67 chung ah pa 47 nu 20 an si. Dr. David Van Bik, Dr. John Cuai Sang, Pu Siang Uk, Pastor Za Hu le Ms. Ni Len Tial nih pumsa in an kan liam tak. Cun ramdang ah aa ṭhial mi 11 an si. Pensen a la mi (1) Ceu Cin, lecturer, (2) Lian Kim, Assistant Librarian  le (3) Pu Ngun Bik, Peon an si.

Siangngakchia

Kum 2019 March tiang ah awnnak certificate a hmu mi cu DipTh 373, BTh 414, BRE 144, BAE 193, le MDiv 58, BMin 26, BBA 27, Dip Eng 29, Dip Ba 118, an dihlak 1382 an si.

Cawnnak Kongkau

Programs

            CCU hi a taktak ti ahcun CCC tiah a min an rak bunh hmasa lio ah a min hrimhrim nih a langhter bantuk in biaknak lei lawng si lo in liberal arts subjects zong kan cawn lai ti in lungfah bu in rah dirhmi a si. Nihin ah biaknak lei program paruk – DipTh, BMin, BTh, BRE, Master of Arts in Christian Studies (MACS), MDiv – le liberal arts program pahnih – Bachelor fo Arts in Language Studies (BAE) le Bachelor of Business Administration (BBA) tuah a si. Non-dgree programs ah DipBA le Dip English an si. Cun American cozah he ACESS Mirang ca cawnnak kan tuah ti. Cawnmi program le thawk kum cu a tanglei bantuk in a si.

Theology programs

  1. DipTh 1990 in thawk a si i 2010 ah kan ngol. 2013 in kan thawk ṭhan.
  2. BRE             1995
  3. BTh             1994
  4. MDiv 2010
  5. BMin 2015
  6. MACS 2019

Liberal arts program

  1. BA(English) 2001
  2. BBA 2014

Social Science, Computer Science, Languages, le Developments he aa tlai mi hi thawk ding in saduhthah a si.

Skype Class

Pathian khuakhan hi khuaruahhar a si. Ram dang ah kan miphun an kal tikah voi tampi cu Pu Sawm Hei hla bang an kal lai kan i thlahnak Kaa-Keih            ah ngaihchiatnak mitthli tamtuk a luang. Asinain cu mitthli cu Pathian nih lawmhnak mitthli ah a can ter. Lai Baptist Church, DC Region i mino nih CCU i BAE le BBA siangngakchia kha cacawn Nikhat Ni in Ninga Ni tiang zinglei sml 8:30 – 9:30 suimilam pakhat chung ni fatin skype in ca an chimh hna. Kan fale caah san a tlaih zia le a hlawk zia cu hmurka in chim khawh lo tiang khi a si. An cung ah kan i lawm ngaingai. Online in cachimh hi 2014 in kan thawk. Skype tlam a tlin khawh nakhnga internet bunhnak a kan bawmtu bik cu Roger Strait Foundation a si.

BBA

 Bachelor of Business Administration program hi ramdang um riantuanhawi thazaang in dirhmi a si. Kum ruk an kan bawmh cang. Tu kum 2019 in project a dih lai i a thar kan hmuh ti lo ahcun CACC kanmahte in pehzulh a hau men lai.

 Inn le lo, thil le ri

Kum 2000 i ATESEA in Accreditation Team an rat lio ah CCU cu Hakha Baptist Association (HBA) compound chung ah a rak um rih. Thing inn 100 ft x 24ft dothnih pakhat (a hnu ah Sang Ling Education Center caah an hman), le thing inn 40ft x 20ft dohhnih pakhat a rak um. A kum vui 2001 June thla ah atu CCU umnak Lungtat Chiahrawn, Cawbuk ah an rak i ṭhial. Rak i ṭhial ka ahhin zung le ca cawnnak caah tlakrawh inn dot hnih pakhat, nu siangngakchia umnak tlakrawh tenh dot hnih pakhat, library le cawnnak caah hmanmi tlakrawh pucca inn dot hnih pakhat, pa siangngakchia umnak tlakrawh tenh dot thum pakhat, rawlchuang umnak thing inn pakhat, le durwan umnak thinginn pakhat a rak um.             Pathian a ṭha tuk i duhsah tete in inn le lo a hung um hniahmah.

A cung lei  kan chimmi pin ah keimah ka hngalh tawk CCU inn, thilri a pipa deuh a hlutu le sak kum cu a tang lei hi an si.

 Inn

Ca cawnnak, hostels le zung inn

  1. David Van Bik Building, pucca brick, dot hnih (certual chak).
  2. Students Building, pucca brick, dot hnih (certual pawng).
  3. Van Hre Building (Male Hostel), tlakrawh tenh, dot thum. Rev Van Hre min in sak a rak si.
  4. Dining Hall le coka, tlakrawh tenh dot hnih (2008)
  5. Female Hostel, tlakrawh tenh, dot hnih.
  6. Main building, RC dot li (16,800 sq ft). Kum 2017 ah kan lim. A dihmi Ks. 587,536,856/- a dih.

Library

Gloria Deo Library Building, RC dot hnih. Ks. sing 651. Dallas Chin Baptist Church, thazaang in 2005 August ah kan lim. Mah lio ahhin Dallas ah Lai Khrihfabu pakhat lawng a rak um. Dallas um Laimi dihlak nih an kan bawmh tinak a si. Cun mah innpi hi tleicia Pu Tum Khar (Sang Luai pa) min in sak a rak si.

Quarters

  1. CCFDK Building, tlakrawh tenh, two units. Ks. sing 240. Chin Christian Federation in Denmark, 2009. Saya Peter Hrang Lian Thang le Saya Thla Lian an um.
  2. Staff Quarters, thing (CCFDK building pawng), 2013. A tu lio ah CCU Librarian Hram Vung a um.
  3. Female Warden Quarters, thing inn. Roger Strait Foundation nih 2014 ah an sak. Sayama Biak Hlem a um.
  4. Staff quarters (Lichia kalnak lam pawng), kum 2018 ah sakmi: tlakrawh tenh inn ah Sayama Ling Yaung, thing inn ah Sya Abednego an um.
  5. Durwan quarters, thing inn. Pu Duh Tum Peng a um.

 Thial khawh lo mi 

  1. Pumpululh chuihnak certual. Ks. sing 93. CCU President nih Dan Mission (Denmark) ah a hal hna i kum 2011 ah aa lim. Vuanci Pu Ngun San Aung nih vawlei chunhnak seh bulldozer man lo in thla ruk chung a kan hlanh.
  2. Central Rual-U thazaang in CCU Tennis Court, kum 2017.
  3. Texas Chin Baptist Church thazaang Ks. sing sawm li in concrete vailamtah 30 ft a sangmi, kum 2015.
  4. Henry Siang Kung le an nu nih pangpar dum luhnak kotka ah lung in tuahmi vailamtah.
  5. Rev Simon Thawng Hmung nih CCU Signpost.
  6. Permanent Stage, 88 ft x 53 ft, kum 2018. Certual chak zawn ah a um.
  7. Mini hydro power, Ṭhengsih va. Ks. sing 80 hrawng. Lai Baptist Church Nu Bu, DC Region. Cozah electric tha a rat cang caah kan hmang ti lo.

Eidin zuarnak inn (Canteen)

  1. Lailungrawn Canteen. WACCC Nubu, Perth, Australia nih Ks. sing 30 an kan bawmh i a dang cu CCU nih kan chap. Kum 2010.
  2. Elizabeth Johnson Dinning Hall. Ks. sing 80.Lai Baptist Church Nu Bu, DC Region.

Guest House

  1. David Van Bik Guest House, thing inn dot hnih, ihnak khan pariat a um. David Van Bik Foundation thazaang in 2018 ah sak a si. Cozah sin ah license kan tuah.

Thil pipa deuhdeuh

  1. CBCUSA Nu Bu. Ks. sing 283, kum 2012.
  2. Skype Class ca a herhmi mei le thilri. Roger Strait Foundation. 2004.
  3. CBCUSA chungtel Khrihfabu i Mino Bu hna bawmhnak in meeting room cabuai le thutdan pawl.
  4. Henry Siang Kung chungkhar nih chaptel ca thir thutdan 210.
  5. CYO North America bawmhnak in CCU Website.
  6. CCF Malayisa nih pakhat, Chin Evangelical Baptist Church, Dallas nih pakhat.
  7. Copier machine a nganmi. Lai Baptist Church, DC Region.
  8. CCU Alumni (AAC) thazaang in thawkmi concrete lam, CCU luhnak vokril kotka in main building car park tiang.

 

Computer, cauk, le thilri dangdang in bawmtu dihlak cu cahmai a tam tuk lai caah kan telh lo. Cun tuan deuh lio i pechantu le bawmtu min dihlak kan hngalh khawh ti lo caah kan hrelh mi zong a um len lai. A ruah zia kan thiam sawh u. Nan dihlak cung ah kan i lawm.

Sianguk thlahlawh

2001-02 = Ks. 16,500

2002-03 = Ks. 21,000

2003-04 = Ks. 33,000

2004-05  = Ks. 35,000

2005-06 = Ks. 37,000

2006-07  = Ks. 41,000

2007-08 = Ks. 85,000

2008-09 = Ks. 95,000

2009-10 = Ks. 110,000

2010-11 = Ks. 140,000

2011-12 = Ks. 160,000

2012-13 = Ks. 190,000

2013-14 = Ks. 225,000

2014-15 = Ks. 250,000

2015-16 = Ks. 350,000

2016-17 = Ks. 400,000

2017-18 = Ks. 420,000

2018-19 = Ks. 470,000

2019-20 = Ks. 510,000

Kum 20 chung ah CCU President thlahlawh cu let 30.91 a kai.

Chunmang: Nunnak Duhdim Caah Fimthiamnak

             CCC a rak si lio i a chunmang cu university ser ding a si. University ah ser a hung si hnu in CCU a chunmang cu “Nunnak Duhdim Caah Fimthiamnak” (Education for Abundant Life) ti a si.  University tiah hun thlen tikah sianghleiruun i a cacawnnin le fimthiamnak khuaruahning cu Khrihfa zumhnak le khuaruahnak (Christian value) cung ah hram a bunhmi a si. Jesuh nih vawlei ah a rat tikah aa hmaithlakmi rian pathum a um. Cu hna cu: Thawngṭha chimnak (preaching); Cawnpiaknak (teaching); le Damternak (healing) an si. Hi rian pathum a funtomtu le Jesuh vawlei a rat hnawhchan cu Nunnak Duhdim kan ngeih nakhnga caah a si. Johan 10:10 hi CCU version in kan leh ahcun:

“Vawlei cung sianginn tampi cu siangngakchia an khuaruah khawhnak thah duh le an thluak kholh le hrawh duh  ah an dirh. Kei ka sianginn cu siangngakchia nih biatak kha an hngalh i cu biatak nihcun nunnak duhdim lei ah a luat ter hna nakhnga caah ka dirh,” ti khawh a si.

 B2AMart

 CCU i BBA program min in B2AMart timi “mini market” cu August 2019 in kan tuah. Hakha khua, Dawrthar sang Pu Ral Hu inn tang ah kan tuah. Khaisup khaisap, coka le tikholhnak khan ah hmanmi thil, thilri a phunphun, ngakchia lentecelhnak, catialnak tbk a phunphun kan zuar. Nan chungkhar zong nih tha rak pe ding in thawng kan thanh piak ding ah kan in sawm hna. Mah dawr tha na pek mi cu mission le miphun rian na tuan a si.

Pehtlaihnak

Postal address: Chin Christian University

No. 81 Strait Road, Cawbuk

Hakha, Chin State

Email:                         ccuhakha@gmail.com

Telephone:      Office: 070 21339; 070 22505

Library: 070 21888, President: 092450100

Website:   www.ccu.edu.mm

Reference

  1. Dr. Bawi Hu. “CCC Thawhkehnak Tuanbia Tawi,” CCC Annual Magazine, 2004-2005, pp. 8-10.
  2. Johnson, Robert G. History of The American Baptist Chin Mission, Vol. 1. Valley Forge: Published by the author, 1988.
  3. Johnson, R.G. On The Back Road to Mandalay. Thomas Nelson, Inc. 2007.
  4. Tin Fam. “A Brief History of Chin Christian College (1990-2000)”. BRE Thesis, CCC, Hakha, 2000.
  5. CCU Catalogue 2019-20.
  6. CCU annual magazine 2016-17

 

About The Author

Na ruahning rak langhter ve.. (Leave a comment)

%d bloggers like this: