Hlan Chin Thilthuam le Rakhine Thilthuam Hmuhsaknak Hakha ah An Ngei
Tawlreltu Mai Anna Biak Tha Mawi le Daw Nu Mya Zan
Tuchan ah hmuh awk a har ngai cangmi hlan Chin thilthuam le Rakhine thilthuam hmuhsaknak (ဒျဗဳတ္ပြင့္နွင့္ ၾကက္သားအမိ) cu Mai Anna Biak Tha Mawi (Aidii Weaving House) le Museum Consultant Daw Nu Mya Zan (Rakhine) hruainak in November 30-December 1, 2018 tiang tleicia Rev. Van Hre Lai inn@ Zion Cultural Museum ah an tuah tiah theih a si.
Tutan an tuahnak hi Yangon um Britist Council tawlrelnak in Craftspace, UK nih tuahmi England UK ah Museum (piahtaih) thilthuam zoh Khualtlawnnak June17-24, 2018 ah Kawlram, Thailand, Malaysia in Museum lei thiam pakhat le kutzung mawi thiam pakhat cio le Philippine in an kai hna. Cu a kaimi hna nih a tak in hmuhsak thannak caah timhtuahnak an ngei I Yangon ah voikhat, Hakha ah voikhat tiah a tu bantuk an tuah thannak hi a si tiah theih a si.
Hi an tuahnak kong he pehtlai in Mai Anna Biak Tha Mawi nih “ Hlan kan pipu chan in rak ngeihmi thilthuam runven zohkhenhnak ca le kan mino le nih Lai thil an sunsak chin khawhnak hnga caah kan tuahmi a si. Tutan hlan Lai thil thuam hmuhsaknak kan ngeimi ka lungsi ngai. Upa tampi zong an ra. Hmailei zong hi nak tha in tawlrel than khawh kan izuam lai” tiah The Chinland Post ah a chim.
Mileng le hmuhsaknak kong he pehtlai in Daw Nu Mya Zan nih “ Ka lung si deuh rih lo. A rak kan lengmi an tam ko nain thilthuam kip ah hi thil hi zeidah a si, zeitik caan ah dah hmanmi a si tiah ca kan khenh chih dihmi a um. Cucu ka ngiat hna tikah aho hmanh nih an rel ka hmu lo. Thilthuam hmuhsaknak innlem (Museum) ah thil zoh ning cang le cun hi bantuk kan zoh bal theng lo timi a langhter ngai caah hmailei riantuan ding le ihliphlau ding thil tampi kan ngei rih ko” tiah The Chinland Post ah a chim.
Anna Biak Tha Mawi cu 2011 Myanmar Institute of Theology (MIT) ah Bachelor of Religious Studies (Liberal Art) a dih in 2014 ah Myanmar Film school ah a rak kai. Biazai lei zong siseh, kutzung mawi lei a huam ngaingaimi a si. 2014 in Hakha ah Aidii thiamsin tahnak (Aidii Weaving House) zong a tuah i miphun thilthuam humnak caah rian a tuan cuahmahmi a si. Daw Nu Mya Zan cu Kawlram ah Museum lei thiamsang ngeih chunhmi a si I Rakhine Myuat Oo khuapi zong Vawlei pi theihpi mi si kho dingin aa zuam vemi a si.
About The Author
