Hlasak Hi Pathian Nih A Ka Pekmi Pahrang A Si Caah Ka Pawcawmnak Tiang A Si Kho Lai Tiah Ka Zumh; Mai Esther Dawt Chin Sung He Biaruahnak
Min: Esther Dawt Chin Sung
Chuah kum: 1998, Feb 20
Chuahnak: Hakha
Nu le pa min: Pu Albert Chan Cung Hnin, Sayama Par Ki
Cawn lio mi: Economic Major, Final. Yangon University
Huam mi: Hlasak, Ti lio le Ei.
Biaruahtu: Salai Ngun San Aung
A hmun: Hakha
Digest: Hlasak hi zeitik in dah na rak i thawk?
Esther: Kumthum ka si in ka Ni Dawt nih a rak ka sakpi. Mah cun kaa rak i thawk hmasa.
Digest: Hlasak zuamnak tibantuk ah naa tel in laksawng na lak bal mi tah a um maw?
Esther: Church School ka kai lio ah HBA CE hlasak zuamhnak an tuah mi ah laksawng voi hnih ka lak bal. Cun, a voi 16nak 2008, Sak, Laam, Tial le Tum (Suu-kah-yi-ti) Kawl ram huap in pakhatnak laksawng ka rak lak bal.
Digest: Na ngakchiat lio ah ka upat tik ah zeibantuk si te ning ti mi saduhthah na rak ngei maw?
Esther: Hlasak hi ka hmet tein ka duh i ka tim peng mi a si.
Digest: Hlasaklei ah a hodah na uar bik? I zohchun mi na ngei maw?
Esther: Pi Sung Tin Par hi ka uar bik i kaa zohchun mi zong a si.
Digest: Chin Idol aa zuam mi lak ah hruk-aih ningcang siseh hlasak tik zong ah thangthat na tong ngai. Zeitluk in dah zuamnak ca ah tim-htuahnak na ngeih i caan na lak na kan chim kho hnga maw?
Esther: Zuamnak a si bantuk in ka upat, ka sunhsak, kan pum a dam i hla kan sak khawh nakding ah mitkuh cim tein ka it, zing ah exercise ka tuah. Keimah tein ka aw kaa khumh i kaa ngaih than. Cuticun self training tampi ka la.
Digest: Chin Idol zuam lio ah na nu zong a dam lo tik ah chungkhar herhhai rian zong biatak tein aa khinh chih ti kan theih. Chungkhar lei sining ruang ah Chin Idol zuamnak ca ah lung duh tluk in caan ka pe kho sual lai lo tibantuk lungretheihnak hna na rak ngei maw?
Esther: Kei hi zeipoh ah lungdai tein a tuah mi ka si ca ah le ka chungle zong nih tha an kan pek mi a si caah chungkhar lei sining nih hnahnawhnak zeihmanh a ka pe lo.
Digest: Zuamnak a si tik ah tha petu he soiseltu he (tha pe lotu) zong um a si i, cu pin ah atu cu IT chan a si bang internet hna in tanhtu he tanh lotu he an lungput langhter cio a si i, an tanh lotu leikap chim mi biaholh na theih mi kong ah na feeling kan chim ta law?
Esther: Chikkhat cu lungzornak cu ka ngei ve. Asinain Laimi cu Peng le Tlang in a qang mi kan si tik ah hi bantuk pawl hi ka thinlung ah thilrit in kaa chiah lem lo. I remhnak tu ah hman khawh kaa zuam.
Digest: Hi hnu in hlasaknak lei ah zeitlukdah karhlan naa timh?
Esther: Hlasaknak leikap in karhlan ding tim-hlamhnak nganpi ka ngei.
Digest: Chin Idol na hun si cang tik ah zeitluk in dah Chin miphun chung awn-mawi lei dir-hmun ah quanvo ka ngei tiah naa ruah?
Esther: A biapi cun Idol pakhat dirhmun ka si tik ah ka ram le ka miphun zong cawisan ding hi a hmasa bik ah quanvo ka ngei tiah kaa ruah.
Digest: Cu hlan hla na saknak chung ah hi zawn ah ka chambau deuh kaa zuam a herh na ti mi a um maw? Cun timhtuahnak tah zeitluk na ngeih?
Esther: Ka chambau mi tampi lak ah High Pitch (aw sang) duh ning tluk in ka phan kho lo. Cun aw sum (control) lei ah ka chambau rih.
Digest: Hlasak in pawcawmnak tiang karhlan naa tim maw? Cucu a si kho lai tiah na ruat maw? A ruang?
Esther: Hlasak hi Pathian nih a ka pek mi pah-rang a si caah ka pawcawmnak tiang a si kho lai tiah ka zumh. Zeithil poh hi Pathian sin ah zumhngamhnak in hal ve ahcun a si kho ko lai tiah ka zumh.
Digest: Hlasak thiam pakhat dirhmun phak nakding ah zeidah a herh bik tiah na ruah? Cawnnak maw pumpak zuamnak dah?
Esther: Mahte cawn (Self training) hi a biapi bik ah ka ruah. Cun sining pek ahcun cawn in va thiam zong a biapi tuk ve.
Digest: CACC nih hlaphel chuah ding an ti mi kha tah timhtuahnak a um cang maw?
Esther: Tu hi kan i ceih cuahmah lio a si.
Digest: Laksawng a hmuh mi zong midang ca deuh ah a hlut dih ngawt tiah kan theih? Zeiruang bik ah a si?
Esther: Pathian nih ka phu tawk lo in a ka pek mi thluachuah a si caah Amah ram kauhnak ca ah ka hman mi asi. Pathian cu zeizongte a ngeitu a si caah hmailei ka herh mi ca ah Amah kaa bochan i hmailei zong ah hitihin tuah khawh lengmang kaa zuam ko lai.
Digest: Voi nolh Chin Idol cu zeibantuk muis-am deuh in tuah siseh tiah ruahnak na ngeih mi a um maw?
Esther: Hla zah (by heart) in sak khawh ding ah cawnnak caan hi a tlawm deuh tiah ka ruah. Hlasak a thiam tuk ko mi hna zong hla an zah lo ruang ah an tlak mi kha lung a nuam lo ngai. Hla fungkhat ah nithum hrawng tal cawnnak um sehlaw a tha.
Digest: Lai hla phuahtu lak ah hodah na uar bik?
Esther: Saya Hniang Ceu Ling le Pu Herh Lian ka uar bik hna.
Digest: Lai mino tampi nih Lai hla nakin mi-phun dang hla kan uar kan sak deuh cang mi hi zeiruangah a si tiah na ruah?
Esther: Hihi cu a chan nih a kalpi mi a si ko tiah ka ruah.
Digest: Kan Laimi hlasak thiam cheukhat an laar sin in pasal an ngeih mi hi zeitin na ruah? Cun pasal a ngei cang mi kan aw tha pawl an lar khawh ti lo mi hi tah an pasal le maw anmah maw mizapi dah kan mawh tiah na ruah? Asilole na hmuhning a ruang (reason) dang hna um maw?
Esther: Nupi/Pasal ngeih hi i hnawh tuk ding a si lo tiah ka ruah. Tuan tuk pasal ngeih cu tha ka pe lem lo. Chungkhar an ngeih cang caah caan an pek khawh ti lo ruang ah a si bik ko lai.
Digest: Nang tah zeitluk ah dah pasal ngei ning tibantuk rikhiah mi siloah saduhthah na ngei maw?
Esther: Ka chungkhar, ka nau le cung ah upa bik dirhmun in quanvo nganpi ka ngeih caah ka nau le dirhmun an ngeih hlan cu pasal ngeih kaa tim rih lo.
Digest: Lai mino nih hla lei kan thancho nakding kan herh tiah na ruah mi?
Esther: Hla tampi in ngaih. Hla phunphun a um caah phun tam deuh in ngaih a herh. Nu le pa nih a huam, a thiam mi kha tha pek thiam a herh.
Digest: Lai bia/holh ca le kan hla kan thlau chin cuahmah mi hi zeitindah kan kilven lai i kan tharchuah than ah a tha lai tiah na ruah?
Esther: Hakha kan zoh tik ah, ka catar mi tehna zong nih Kawl ca nak in Laica hi hmang deuh usihlaw zatlang chung ah miphun dang holh nakin kan Laiholh hmang deuh usih. Cun kan Lai hla hi International level in phuah kho ve hna seh. A melody ah sak zuam mi si a herh.
Digest: Hlaphel chuah ding in timhtuahnak siseh, pumpak in siseh timhtuahnak na ngei cang maw?
Esther: Hlaphel bel cu CACC nih an tuah mi hi keimah pumpak in ka voikhatnak hlaphel a si lai caah mah hi tha deuh tein timhlamhnak nganpi he i chuah rih ko ning ti ka duh. Youtube chiah ding cu kan tuah cuahmah lio a si. Ram hla a si.
Digest: Hlasak ding in sawmnak na don mi a um cang maw?
Esther: April thla khi Australia ah Biaknak inn thar sak nakding fund kawlnak ca ah an ka sawm mi le June thla ah International Zophei Youth Fellowship nih an ka sawm mi hi ka aw… cang mi an si.
Digest: Tha petumi/Careltu mizapi sin ah chim na duh mi?
Esther: Tha petu nu le pa unau nan cung ah lawmhnak tampi ka ngei. Atu hi ka hramthaw-knak lawng a si rih i hmailei zong ah nan thlacamnak le thapeknak ka herh rih ko.
Theiternak: Hi capar cu Chin Digest Vol 3, No. 5 (December 2018) ah a rak chuak cangmi a si.
About The Author
