Hlasak Thiam Paling Strove He Tonbiaruahnak

0

Salai CungCung|2019 May 17| Hakha hlasak thiam Paling Strove nih May 15 zan ah “A king Mini Album” cu Aidi Weaving House ah Listening Party a tuah tiah kan theih.

“Ahmasa bik ah tubantuk in Album ka chuah khawh hi Pathian min ka thangthat. Cun hi album chuah ding in a ka bawmtu ka hawile cung ah kaa lawmtuk. An riantuannak cio ah Pathain nih umpi ko seh. Ka hawile a ka bawmtu hna cu, Cin Sang, Biak Hlei Thang, Biak Lian Ching, Salai Joseph, Levi, Phiar Mang an si” tiah a chim.

“Ka Ablum title min ah “A King” tiin ka pek. Hi ka peknak a sullam cu ngaknu pakhat nih a darling a kaltak hnu amah lawng a nun king tein a ummi khi ka chim duhnak cu a si. Hi A King timi Ablum title min pek ding ah ka hawile pathum ruahnak hal in kan bunhmi a si. Tu lio Laimi kan dirhmun in Album tuah hi a har tuk. Keimah ka ruah ning ah tu ka Album hi fa ka hrin tluk in ka ruah caah hawi le kom he tonbiaruahnak ngeih in hi ka Album sunhlawihnak ding caah Listening party ka tuahnak hi a si. Hi party ah ka sawmmi hna cu ka hawikom pawl le music lei in ka u nau pawl minung 100 hrawng ka sawm hna“ tiah Paling Strove nih TCP ah a chim.

“Hi ka Album ah hla fung 5 aa tel. Hla zapi in an tha dih ko, cun ka lung zong an tling dih nain mipi nih an duh bik lai ti ka ruahmi cu “A King” hi a si lai tiah ka ruah. Hla ka sak le ka phuah mi zapi hi 30 in 40 kar hrawng a si men lai. Hlasak hi ka ngakchiat tein ka rak zuam cang. Ka pa nih zingka ka thawh ka tein hla a ka sak pi peng. Hlasak hram kaa thawk hi cu 2011 in a si. Kei hi phundang deuh hawi he aa khat lomi ka duh caah phundang deuh te in ka kal. Hla cu zeibantuk paoh ka tuah dih ko, mizapi nih ka min an theihnak cu Rap hlasak in a si”.

“Ramleng chuah hi an ka sawm pah ko nain visa ka ngah tawn lo caah ka kal kho bal rih lo. Hmailei misic lei kaa timhtuahmi cu “A King” Album a dih in “Tang Dawr Nun” timi chuah than ka tim”.

Paling hi Unau 5 an si  i pa lakah a hniag bik a si. A chuahkehnak khua hi Thantlang peng Hlamphei a si, atu cu Hakha ah khua an sa cang. Ka nu le ka pa cu Rev. Dr. Lian Do Kham le Pi Zing Doi an si.

“Hmailei Laimi music lei kan thancho khawhnak ding ah kan Laihla te hi a satu lawng si lo in mipi lei zong nih thazaang pek thiam kan herh. Hlasatu zong nih kan hla pawl quality tha tein tuah a herh. Thinlung dih lak in riangawn cung ah i peh u sih law kan thancho chin lengmang ko lai. Music lei kong he pehtlai in chanthar hlasak le hla phuah ah hlanchan ka u le cu kan tluk bak hna lo. Hla in pawcawm khawhnak ding ah hin cun mipi lei nih biatak tein thazaang pek hi a si. Kan Laimi nih hla phuahmi cung ah hin cun chim awk ka thei lo, a ruang cu hla phuah hi mah le thinlung chung chuak in phuahmi a si caah. Hlasa tikah biatak tein thinlung dihlak chuah in sak ding a si. Cun mipi zong zeitin an i nuamh lai ti ruah bu in sak ding a si. Laimi tam deuh cu hla an sak tikah an hla cung ah  mode full in an pe kho tawn lo. Hlasak tikah hla cung ah lungthin dihlak chiah in sak ah cun mipi zong an i nuam” tiah a chim chap.

A King timi Album ah  pakhatnak A Poi lo, pahnihnak Lung Dong Hlah, pathumnak Tih Hlah, Palinak A King, panganak Ka Darling Si Law timi hla pawl an si. Hla phuahtu hna cu Paling, Cung Hlei Lian, Vaal Te, Biak Tin Hmung, Cover David Alexandria, Featuring T Lian. Music tum tu pawl cu Doron Band, Zomi, Roland, Dodo. Studio ah Bethany, Music House, Aa mi Studio, Kalay MMC Master le Mixing ah Sann Moe Htet an si tiah kan theih.

About The Author

Na ruahning rak langhter ve.. (Leave a comment)

%d bloggers like this: