Hmawngtlang Khuataw Cozah Lam Kauhding mi Cu Hmawngtlang Khuami Nih An Kham
Hmawngtlang Mino nih Lamcawh dingmi Kham lio/by LMZ mino
TCP-Hakha| 2020 May 5| Chin ramkulh Cikha in Paletwa tiang Ramkulh ramthluanpi cu Hakha in Hnaring khuapi kar lam a chiatnak cu Lautu, Mara Zophei Lam Committee nih an zohfel I Chin ramkulh Cozah sin ah remhpiak dingin an tuahmi chungin Hmawngtlang khuataw lam (Palakah lam) pe 12,000 tluk asaumi cu Hmawngtlang nih kan Leikuang a rawk lai an ti caah Cozah No.10 lamzung lei nih lam chunh ding an va zohmi cu an kham hna tiah theih a si. Mi lamchunh ding zohmi ah Thantlang simanking penguk, vawlei tahzung le Lautu, Mara, Zophei lam committee in mino le upa hna zong an kal ve tiah theih a si.
“Keimah pumpak in ka kal kho lo. Thil sining cu ak almi halte ko hna law. Thantlang in Hnaring tiang hi lamchiatnak le khondennak a umtawnnak hmunhma (3) remhding cu Lautu, Mara, Zophei khuakomh (9) nih Cozah lei an rak halmi a si. Hmawngtlang khualuh khuachuah lam a chiat cu theih a si ko I Cucu Tisen le Palangva, Aibur khua lam (pahnih) le atu Hmawngtlang khuataw hi an si. Cozah lei nih Tisen palangva le Hmawngtlang khuataw hi a herh tiin Tangka tlakpiakmi an si. Tisen lei cu an dih deng cang. Hmawngtlang khuataw lawng hi leikuang ekah (150) a rawk lai, Tolreba cinnak a rawk lai an ti. Cozah lamthing a si ko i lam in chak le thlang Leikuang a hrawk ding a um lo. Cun Tolreba zong cu October, 2019 ahkhan an cin chommi a si. Hi thil sining hi Chin ramkulh CM le cunglei upa pawl zong kan chimh hna lai i Chin Ramkulh Vuancichok biachah ning tein a si ko lai.”tiah Chin Ramkulh Lam le Sul Vuanci Sui Thio nih The Chinland Post ah a chim.
Lamchunh dingin Sohlohzii pawl an kal kan theih caah Lautu, Mara, Zophei mino le kan pa le lam committee pawl nih an hnu in kan dawi ve hna. Kan phak ahhin Cozah Lam Zung No.10 cu an rak phan diam cang i an khammi hna kong an kan chim. Mah cu zeitin dah an ruah hnga ti kan va kal cu an rak tam ngai, an kan buk ko. Kan Chin ramkulh lamthluanmi zapi hmanmi lawng silo in Lautu, Zophei, Mara kan lamthluanpi a si caah tha seh, tluang seh kan ti caah kan izuammi a si ti zong ka chimh hna. Anmah lei in cun nan kan ceihhmai zongah kan duh lo lai an kan titop ko. Bu aiawh in a rami ka si caah meeting kan va thu ta ve lai ka ti hna. Hi kan lam a thatnak caah kan izuammi a si I Khuapakhat hnorsuan duh ah kan tuahmi a si hrim lo, Lautu, Mara, Zophei (LMZ) mino zong thaizing meeting zong kan thu than lai. A herhningin kan cawlcang rih ko lai” tiah a hmun a a va kalmi Mara Mino Phu (Mara Thyutlia Py) President Salai Vakhithie nih The Chinland Post ah a chim.
“Lautu, Mara, Zophei(LMZ) upa hna nih voi tampi kan lam a tha lomi thatnak dingin voi tampi meeting an thu, voi tampi Cozah sin ah an izuam, lamkauh ding zong budget pek kan si. Kan ilawm taktak. Asinain Hmawngtlang luh lai ah Cozah nih Ramkulh lam ah pompiak ciami le a pheituk mi kan lampi cu Khuachung lei an luhter tikah an khualuhnak le chuahnak hi a chukcho a ngerngawi i tih a nung ngaingaimi a si. Cucu anmah khua hnorsuan duh ah silo in mizapi le kanmah Lautu, Mara, Zophei, Zotung unau kan zulhbikmi lam a si caah tha seh tiin kan pa le an cawlcanghmi cungah LMZ mino lei zongin kan izuammi a si. Hmawngtlang lei zong nih hmailei ca tampi kan ruatpiak hna seh, kan lam kauh khawh ding hi a phunphun in kan izuam rih ko lai” tiah LMZ mino phu lam committee hruaitu Palian nih The Chinland Post ah a chim.
Hi kong he pehtlai in Hmawngtlang khuabawi le Hmawngtlang ohsuh chairman kan pehtlaih hna nain an phone a off caah kan chon kho rih hna lo.
“Nihin cu Palek minung 20 hrawng an phan ve. Hmawngtlang lei nih thihngamh in an duhlonak an chim. A fawi lai lo” tiah a hmu ve mi hna pakhat nih The Chinland Post ah a chim.
Hakha-Thantlang in Hnaring tiang lam hi 1963 ah Lautu, Zophei, Mara ibawmh in mah kutke tein rak chunhmi lampi a si. 1994 ah Ramkulh Lam tiin theihpimi lam a si. 2014-15 kum Vuancichok Hung Ngai chan ah Thantlang in Hnaring tiang lam kauh a si nain Hmawngtlang khuataw lam tuah tilo in Hmawngtlang khuachung lei an luhter hi a si tiah theih a si. 2017 kum ah Lautu, Mara, Zophei lam committee le khuakomh (ohsuh) pakua nih tih a nungmi lam vialte hnon in a hlan lamphei ning tein chunhdingin Cozah an hal caah Tisen A in Palang va tiang an halmi le Hmawngtlang khuataw lamkauh ding cu Cozah nih budget a chiahpiak hna. Hmawngtlang lei nih an khuachung lam pallo ding an duh lo lengah lamthing cung a ummi leikuang le tolreba cinnak hmun a rawk lai tiah a tu bantuk an duh lo hi a si tiah theih a si.
About The Author
