Hmunhma Peknak Tha A Der Ruang Ah Chin Ramkulh Hluttaw I Nu An I Tel Khawhlonak A Si
Salai Cung| 2018 July 4 | Chin ramkulh hluttaw ah nu palai an i tel lonak a ruang cu party dang ah nu pawl hi hmunhma an pek hna lo caah a si tiah Nulei kongkau a cawlcangtu phu hna nih an chim.
Aluancia 2015 thimnak lio ah khan Chin ramkhel party chung in nu cheukhat an i zuam ko nain party ngan pahnih a simi NLD le USDP nih nu pawl hmunhma an pe hna lo tiah Cho, Chin Nubu in Secretary Pi Khin Win Ye nih a chim.
“Hi party pahnih ahhin nu pawl hmunhma pe chunh hmanh, nu paoh an si dih lo zong ah fimthiamnak (quality) a ngeimi le a tuan kho dingmi an um ko. A taangmi Chin party hna cu hmunhma an pek hna caah nu pawl thimnak ah an i cuh ko” tiah a chimhih.
“Chin ramkulh hluttaw ah mizapi nih thimmi palai 18 le ralkap palai in minung 6, an zapi 24 an si. Hi chung ah nu pakhat hmanh an i tel lo. Chin miphun ramkhel tuahtuannak i nu an thadernak cu pa pawl nih nu hna cung ah ramkhel khuahmuhnak a bi tuk rih timi ruahnak le lungput an ngeih ruang ah a si” tiah CNDP in a rak zuammi Mai Lai Ki nih a chim.
“Pa hna nih hunpiakmi innka hi a bi tuk. A ngaingai ahcun nu pawl fimthiam sang tampi an um ko. Khua, peng le ramkulh dirhmun tiang in nu pawl i tel khawhnak ding a har tuk” tiah a chimchih.
“Chin ramkulh hluttaw Speaker bawmtu U Aung Taan nih cun ramkulh hluttaw hi nu MP palai hna nih tlaihchannak le an uarnak an ngei lem lo. Nu pawl hi Pyithu hluttaw le Amyotha hluttaw lawng i an i zuam caah ramkulh hluttaw ah nu MP an umlonak hi a si” tiah a chim.
Chin ramkulh hluttaw ah nu MP an um lo nain Pyithu hluttaw ah Chin MP nu pakhat le Amyotha hluttaw ah Chin MP nu pahnih an um tiah kan theih.
Ref: Khonumthung News
About The Author
